परिवर्तन आ विकास लेल घण्टी पर मतदान करीः मनिष झा

4 महीना पहिले प्रकाशित

Smrititimes

जनकपुरधाम, ६ फागुन । राष्ट्रिय सवतन्त्र पार्टीके प्रवक्ता तथा धनुषा क्षेत्र नं. ३ के उम्मेदवार मनिष झा परिवर्तन आ विकासक लेल घण्टी छापमे मतदान कर आग्रह केलनि अछि । बुध दिन क्षेत्र नं. ३के नगराइन चौक पर जनता सँ प्रत्यक्ष भेटघाटक क्रममे ओ ई बात बतौलनि अछि ।
नगराइन चौक पर आयोजित कार्यक्रममे लगभग डेढ़ सय लोक रास्वपा मे पार्टी प्रवेश कएलनि। झा नवप्रवेशी सभकेँ स्वागत करैत कहलनि जे हुनकर प्रतिस्पर्धा व्यक्तिगत रूप सँ नहि, बल्कि खराब प्रवृत्ति सँ अछि। ओ कार्यक्रममे जनमत पार्टीक नगराईन नगरपालिकाक नगरअध्यक्ष घनश्याम मण्डल, सचिव रामचन्द्र शर्मा सहित नेता कार्यकर्ता सब रास्वपामे प्रवेश केने छलथि ।
झा कहलनि, “घरदैलो कार्यक्रममे जनता क आँखिमे आशा आ अपेक्षा देखाइत अछि। एहि अपेक्षा केँ पूरा करए लेल परिवर्तन जरूरी अछि। अहाँ सभ केकरो सँ नहि डरू। हम अहाँक संग छी। एहि बेर बिना कोनो डर–भय घण्टी पर मतदान करू। बाँकी काम हम देखेब।”
कार्यक्रममे पार्टी प्रवेश कएने घनश्याम मण्डल कहलनि जे आब बालेन सरकारक विकल्प नहि अछि। ओ कहलनि, “आब बालेन सरकार बनाबी, सभ समस्या समाधान होत। एहि बेर मधेसी केँ प्रधानमंत्री बना क’ इतिहास रची।”
पहिने सँ रास्वपा मे प्रवेश कएने रामलक्ष्मण यादव कहलनि जे नगराइन जेकाँ क्षेत्रमे रास्वपा क समर्थन देखाएल जनमत ई संकेत अछि जे जनता पीड़ा आ समस्या सँ गुजरि रहल अछि।
धनुषा–३ मे झा क चुनावी कमाण्डर जितेन्द्र महासेठ आ प्रमुख सहयोगी अम्भुप्रसाद साह नवप्रवेशी सभकेँ स्वागत करैत राष्ट्र निर्माण अभियानमे जुड़ए आ रास्वपा केँ मजबूत बनाबए क अपील कएलनि। कार्यक्रमक दौरान झा आ हुनकर सहकर्मी सभ स्थानीय राजेश्वर निधि माध्यमिक विद्यालयक निरीक्षण सेहो कएलनि।