धनौजीमे एमाले आ जनमतके नेता कार्यकर्ता कांग्रेसमे प्रवेश

2 घन्टा पहिले प्रकाशित

Smrititimes

जनकपुरधाम, ८ फागुन । धनुषा निर्वाचन क्षेत्र नं. ३ सँ प्रतिनिधि सभा सदस्य लेल बिमलेन्द्र निधि (नेपाली कांग्रेस) क उम्मीदवार एखन घर–घर अभियानमे सक्रिय छथि ।
निर्वाचन नजदीक अबैत जा रहल अछि, ओ गाम–टोल घुमि क मतदातासँ सीधा संवाद कऽ रहल छथि आ कांग्रेसक नीति, कार्यक्रम आ आगाँक योजना सभक जानकारी दऽ रहल छथि ।
एहि क्रममे धनौजी गाउँपालिका–४ मे आयोजित घरदैलो आ भेटघाट कार्यक्रममे नेपाल कम्युनिस्ट पार्टी (एमाले) क जिला सदस्य इंजीनियर रामसागर साह सहित दर्जन सँ बेसी नेता–कार्यकर्ता नेपाली कांग्रेस मे प्रवेश कयलनि । हुनका सभ आगाँक निर्वाचनमे निधि केँ सहयोग करबाक प्रतिबद्धता व्यक्त कयलनि ।
कांग्रेसमे प्रवेश करनिहार नेता सभक कहब अछि जे वर्तमान राजनीतिक परिस्थितिमे लोकतंत्र आ संविधानक रक्षा तथा क्षेत्रक समग्र विकास लेल कांग्रेस उपयुक्त विकल्प अछि ।
ओ सभ कहलनि जे निधिक अनुभव, नेतृत्व क्षमता आ विकासप्रति प्रतिबद्धतासँ प्रभावित भऽ क पार्टीमे आबद्ध भेल छी ।
कार्यक्रममे संबोधन करैत उम्मीदवार निधि पार्टीमे प्रवेश करनिहार सभक स्वागत आ धन्यवाद ज्ञापन कयलनि आ कहलनि जे विभिन्न दलसँ आयल नेता–कार्यकर्ता केँ सम्मानपूर्वक जिम्मेवारी देल जाएत ।
एहि अवसर पर एमाले छोडी कऽ दर्जन सँ बेसी तथा जनमत पार्टी सँ चारि गोटे सेहो पार्टी त्याग कऽ कांग्रेसमे प्रवेश कयलनि ।