जनकपुरधाम मे चुनाव आचार संहिता उल्लंघन के २० हजार प्रचार सामग्री हटाओल गेल

6 महीना पहिले प्रकाशित

Smrititimes

जनकपुरधाम, ८ फागुन । फागुन २१ गते होए वाला प्रतिनिधि सभा चुनाव नजदीक अबैत चुनावी प्रचार तेज भ रहल अछि। एही बीच आचार संहिता के उल्लंघन कए टाँसल लगभग २० हजार प्रचार सामग्री प्रशासन हटौने अछि।
जिल्ला प्रशासन कार्यालय धनुषा जनकपुरधाम नगर क्षेत्र मे विभिन्न उम्मीदवार सभ द्वारा जथाभावी टाँसल पर्चा, पम्पलेट, ब्यानर आ पोस्टर हटौने अछि।

प्रशासन के अनुसार सार्वजनिक स्थान, बिजली के पोल, सरकारी भवन आ सड़क कात मे आचार संहिता के विरुद्ध टाँसल सामग्री हटाओल गेल अछि।
निर्वाचन आचार संहिता के प्रभावी रूप सँ लागू करए लेल प्रशासन गुरुवार के उम्मीदवार आ राजनीतिक दल सभ के एक दिन के समय देलक जे ओ सभ अपन नियमविरुद्ध प्रचार सामग्री स्वयं हटा लेथि। मुदा निर्धारित समय सीमा भीतर सामग्री नहि हटाओल गेलाक बाद प्रशासन स्वयं अभियान चला कए शुक्रवार के करीब २० हजार सामग्री हटा देलक।

धनुषा के प्रमुख जिल्ला अधिकारी प्रेम प्रसाद लुइँटेल कहलनि जे जनकपुरधाम के विभिन्न स्थान पर जथाभावी टाँसल प्रचार सामग्री सँ शहर के सौन्दर्य प्रभावित भ रहल छल आ चुनाव आचार संहिता के उल्लंघन सेहो भ रहल छल, एही कारण सँ कार्रवाई कए हटाओल गेल।

ओ कहलनि जे आब फेर एहन सामग्री टाँसल गेल त कानूनी कार्रवाई कएल जाएत।

प्रशासन के अनुसार हाल के दिन मे उम्मीदवार सभ प्रचार तेज करए के क्रम मे धनुषा जिला के विभिन्न स्थान पर अत्यधिक मात्रा मे पर्चा-पम्पलेट प्रयोग कएल गेल छल। खास कए मुख्य बाजार क्षेत्र, चोक, सार्वजनिक दीवार आ सरकारी संरचना पर नियमविरुद्ध सामग्री टाँसल भेटल।
चुनाव प्रबंधन के व्यवस्थित बनाबए आ शहर के साफ-सुथरा रखए लेल प्रशासन निगरानी बढ़ौने अछि। स्थानीय तह, प्रहरी आ सम्बन्धित निकाय सभ संग समन्वय कए अनुगमन जारी अछि।

एहि बीच चुनाव नजदीक अबैत राजनीतिक दल आ उम्मीदवार सभ मतदाता सँ भेटघाट, घर-घर संपर्क आ सभा के माध्यम सँ प्रचार मे सक्रिय छथि। मुदा प्रचार करैत समय आचार संहिता के पालन करए लेल प्रशासन फेर आग्रह कएलक अछि।
प्रशासन स्पष्ट कएने अछि जे आब सँ नियमविरुद्ध टाँसल सामग्री तुरन्त हटाओल जाएत आ सम्बन्धित उम्मीदवार वा दल पर आवश्यक कानूनी कार्रवाई कएल जाएत।
स्वच्छ, मर्यादित आ व्यवस्थित चुनावी वातावरण सुनिश्चित करए लेल आचार संहिता के कड़ाई सँ पालन कराओल जाएत — प्रशासन एहन प्रतिबद्धता व्यक्त कएने अछि।