जिल्ला प्रहरी कार्यालय धनुषा निःशुल्क आँखा शिविर सम्पन्न

3 महीना पहिले प्रकाशित

Smrititimes

जनकपुरधाम
बैसाख २७ गते ।

जिल्ला प्रहरी कार्यालय धनुषाको परिसरमा समुदाय–प्रहरी साझेदारी कार्यक्रम अन्तर्गत निःशुल्क आँखा शिविर सम्पन्न गरिएको छ। शनिबार आयोजित उक्त कार्यक्रम परिक्रमा सामुदायिक सेवा केन्द्र धनुषाको संयुक्त आयोजना तथा जनकपुर नेत्रालय प्रा.लि.को सहकार्यमा सम्पन्न भएको हो।

कार्यक्रममा जनकपुर नेत्रालयका डा. रविशंकर चौधरी सहितको विशेषज्ञ टोलीले जिल्ला प्रहरी कार्यालय धनुषा तथा मातहतका नगर एरिया भित्र कार्यरत ९० जना प्रहरी कर्मचारीहरूको आँखा परीक्षण गरेका थिए। शिविरमा सहभागी प्रहरी कर्मचारीहरूको आँखासम्बन्धी विभिन्न समस्या परीक्षण गर्नुका साथै आवश्यक परामर्श तथा उपचारसम्बन्धी सुझावसमेत प्रदान गरिएको थियो।

कार्यक्रमले प्रहरी कर्मचारीहरूको स्वास्थ्य अवस्थाप्रति सचेतना अभिवृद्धि गर्नुका साथै नियमित स्वास्थ्य परीक्षणको महत्त्वबारे जानकारी गराएको आयोजकले जनाएको छ। व्यस्त ड्युटीका कारण स्वास्थ्य परीक्षणमा समय दिन कठिन हुने प्रहरी कर्मचारीहरूका लागि यस्तो शिविर निकै उपयोगी भएको सहभागीहरूले बताएका छन्।

समुदाय–प्रहरी साझेदारी कार्यक्रम अन्तर्गत आयोजना गरिएको उक्त स्वास्थ्य शिविरले प्रहरी र समुदायबीचको सम्बन्ध अझ सुदृढ बनाउन सहयोग पुगेको विश्वास गरिएको छ। सामाजिक उत्तरदायित्व अन्तर्गत स्वास्थ्य सेवामा पहुँच विस्तार गर्ने उद्देश्यले आयोजना गरिएको कार्यक्रममा प्रहरी कर्मचारीहरूले उत्साहजनक सहभागिता जनाएका थिए।

कार्यक्रम सफलतापूर्वक सम्पन्न गर्न सहयोग गर्ने सम्पूर्ण आयोजक संस्था, चिकित्सक टोली तथा सहभागीहरूलाई जिल्ला प्रहरी कार्यालय धनुषाले धन्यवाद ज्ञापन गरेको छ।