गलत मेडिकल रिपोर्ट प्रकरणमा डा.सिंह र गोइतलाई ३महिना कैद र २० हजार जरिवाना

2 महीना पहिले प्रकाशित

Smrititimes

जनकपुरधाम

भदौ ९गते । बलात्कारसम्बन्धी घटनामा गलत मेडिकल प्रतिवेदन दिएको अभियोगमा जनकपुरधामका चिकित्सकद्वय डा. विजयकुमार सिंह र डा. रम्भा गोइतलाई उच्च अदालत जनकपुरधामले जनही तीन महिना कैद र २० हजार रुपैयाँ जरिवाना गर्ने फैसला गरेको छ।

आठ वर्ष पुरानो धनुषाको जनकनन्दिनी गाउँपालिका–२ मा १२ वर्षीया बालिकामाथि भएको बलात्कारसम्बन्धी घटनामा चिकित्सकद्वयले तयार पारेको प्रारम्भिक मेडिकल रिपोर्टमा बलात्कार भएको देखिने लक्षण नरहेको उल्लेख गरिएको थियो। पीडित पक्षले उक्त रिपोर्टप्रति असन्तुष्टि जनाएपछि बालिकाको पुनः स्वास्थ्य परीक्षण जिल्ला अस्पताल सिरहामा गरिएको थियो। दोस्रो परीक्षणमा भने शरीरमा चोटपटक तथा यौनजन्य हिंसासँग सम्बन्धित लक्षणहरू देखिएको रिपोर्ट आएको थियो।

यस प्रकरणमा अख्तियार दुरुपयोग अनुसन्धान आयोगले समेत अनुसन्धान गरी मुद्दा अघि बढाएको थियो। विशेष अदालतले यसअघि चिकित्सकद्वयलाई जनही ६ महिना कैद र २५ हजार रुपैयाँ जरिवाना गर्ने फैसला गरेको थियो। उक्त फैसलाविरुद्ध पुनरावेदन परेपछि उच्च अदालत जनकपुरधामले सजाय घटाउँदै जनही तीन महिना कैद र २० हजार रुपैयाँ जरिवाना कायम गरेको हो।

उच्च अदालतको फैसलाअनुसार उनीहरूले यसअघि पुर्पक्षका क्रममा थुनामा बिताएको दुई दिनको अवधि कैद सजायबाट कट्टा गरिनेछ। साथै, पुर्पक्षका क्रममा राखिएको जनही २० हजार रुपैयाँ धरौटीबाट जरिवानाको रकम असुल गर्ने आदेशसमेत भएको छ।

अदालतले यो मुद्दालाई चिकित्सकीय प्रतिवेदनको विश्वसनीयतासँग मात्र सीमित नराखी नेपालको चिकित्सा–कानुनी प्रणालीमा सुधारको आवश्यकता समेत औँल्याएको छ। स्वास्थ्य तथा जनसंख्या मन्त्रालय, नेपाल मेडिकल काउन्सिल र चिकित्सा शिक्षा आयोगलाई चिकित्सा–कानुनी परीक्षण, फरेन्सिक मेडिसिन, प्रतिवेदनको गुणस्तर, विशेषज्ञ जनशक्ति तथा प्रमाण संकलन र अभिलेखीकरण प्रणाली सुधार गर्न विभिन्न निर्देशन दिएको छ।

यस फैसलाले यौनजन्य अपराधको अनुसन्धानमा मेडिकल प्रतिवेदनको विश्वसनीयता र चिकित्सकको व्यावसायिक जिम्मेवारीको विषयलाई पुनः बहसमा ल्याएको छ।