नागरिक आरोग्य सेवा केन्द्र सिरसियालाई ल्यापटप हस्तान्तरण

1 घन्टा पहिले प्रकाशित

Smrititimes

जनकपुरधाम
भदौँ १८ गते । प्रादेशिक आयुर्वेद तथा वैकल्पिक चिकित्सालय, मुजेलिया धनुषाले नागरिक आरोग्य सेवा केन्द्र सिरसियालाई एक थान ल्यापटप हस्तान्तरण गरेको छ।

नयाँ आर्थिक वर्षदेखि बिरामीको तथ्यांक संकलन, घरदैलो कार्यक्रम, योग सेवा तथा विभिन्न स्वास्थ्यसम्बन्धी डाटा संकलन र अभिलेखीकरणलाई थप व्यवस्थित बनाउने उद्देश्यले ल्यापटप उपलब्ध गराइएको हो ।
प्रादेशिक आयुर्वेद तथा वैकल्पिक चिकित्सालय मुजेलियाका प्रमुख डा. महारुद्र कुमार ठाकुर तथा भोला महतोको उपस्थितिमा ल्यापटप हस्तान्तरण गरिएको जनाइएको छ। कार्यक्रममा मिथिला बिहारी नगरपालिका प्रशासनिक अधिकृत उपेन्द्र न्यौपाने, जिन्सी शाखाका जीवछ यादव तथा स्वास्थ्य शाखाका कर्मचारी रामशंकर साहको समेत उपस्थिति रहेको थियो।
ल्यापटप बुझ्दै नागरिक आरोग्य सेवा केन्द्र सिरसियाका सेवा प्रमुख अरण झाले नयाँ आर्थिक वर्षदेखि केन्द्रबाट प्रदान हुँदै आएका सेवा तथा कार्यक्रमसँग सम्बन्धित तथ्यांकलाई डिजिटल माध्यमबाट व्यवस्थित रूपमा संकलन तथा अभिलेख राख्न यसले महत्वपूर्ण सहयोग पुग्ने बताए।
स्वास्थ्य सेवाको प्रभावकारिता बढाउन, बिरामीको विवरण सुरक्षित राख्न तथा घरदैलो र योग सेवासहितका कार्यक्रमको तथ्यांक व्यवस्थापनमा ल्यापटपको प्रयोग गरिने बताइएको छ।