मिथिला बिहारीमे ४८३ परिवारकेँ लालपुर्जा वितरण

5 महीना पहिले प्रकाशित

Smrititimes

जनकपुरधाम जेठ २ गते। धनुषाक मिथिला बिहारी नगरपालिकामे ४८३ परिवारकेँ गाउँब्लक जमीनक लालपुर्जा वितरण कएल गेल अछि।
ई लालपुर्जा साबिक मिथिलेश्वर निकास गाविसक वडा नम्बर ६, ७, ८ आ ९ मे पुस्तौँ सँ गाउँब्लक जमीन भोगचलन करैत आबि रहल परिवारसभकेँ देल गेल अछि।
नापी कार्यालय धनुषाक २ नम्बर नापी टोलीक प्रमुख सियाराम साह जनौलनि जे गाँवब्लक जमीनक नापनक्सा आ दर्ता प्रक्रिया पूरा कए शनिचरदिन लालपुर्जा वितरण कएल गेल।
ओ कहलनि जे एहि क्षेत्र सँ कार्यालयमे दर्ता भेल ६ सय ५८ आवेदनमध्ये अखनधरि ४ सय ८३ गोटेकेँ जग्गाधनी प्रमाणपुर्जा देल जा चुकल अछि। बाँकी परिवारसभकेँ सेहो जल्दी सभ प्रक्रिया पूरा कए प्रमाणपत्र देल जाएत।
टोली प्रमुख साहक अनुसार लालपुर्जा भेटलासँ परिवारसभक जीवनस्तरमे सकारात्मक बदलाव आएत।
वडाध्यक्ष सुरेन्द्रकुमार मण्डल कहलनि जे पुस्तौँ सँ भोगचलन करैत आबि रहल गाउँब्लक जमीनपर कानूनी स्वामित्व पाबै लेल स्थानीय लोकनिक लम्बा संघर्ष आ सरकारी कर्मचारीसभक निरन्तर प्रयाससँ ई सम्भव भ’ सकल अछि।

लालपुर्जा पाबि स्थानीयवासीसभ खुशी व्यक्त करैत कहलनि जे आब हुनका सभकेँ अपन पुख्र्यौली जमीनपर कानूनी अधिकार भेटि गेल अछि।

कार्यक्रममे नगरपालिकाक प्रमुख प्रशासकीय अधिकृत उपेन्द्र न्यौपाने, कार्यपालिका सदस्य रामउदगार दास, सर्वेक्षक राजिवप्रसाद साह, अमिन श्यामराज पण्डित, सञ्जय यादव सहित विभिन्न राजनीतिक दलक प्रतिनिधि आ कर्मचारीसभ उपस्थित छलाह।फोटो ः बिजय कुमार साह