धनुषामा जेठभर १५ लाख ७५ हजार रुपैयाँ फिर्ता, ८ लाखभन्दा बढी जरिवाना असुल

2 घन्टा पहिले प्रकाशित

Smrititimes

जनकपुरधाम
असार ३ गते ।
जिल्ला प्रहरी कार्यालय धनुषाले जेठ महिनामा अपराध नियन्त्रणसँगै आर्थिक अपराध न्यूनीकरण, जरिवाना असुली तथा पीडितको रकम फिर्ता गराउने कार्यमा उल्लेखनीय उपलब्धि हासिल गरेको जनाएको छ । प्रहरीले सार्वजनिक गरेको मासिक प्रगति विवरण अनुसार अनुचित लेनदेनसम्बन्धी ९ वटा निवेदन मिलापत्रमार्फत टुंग्याउँदै पीडित पक्षलाई १५ लाख ७५ हजार रुपैयाँ बराबरको रकम फिर्ता गराएको छ । यसले आर्थिक विवाद समाधान तथा नागरिकको सम्पत्ति संरक्षणमा प्रहरीको सक्रियता देखाएको छ । फैसला कार्यान्वयन अभियानअन्तर्गत ९८ जना फरार अभियुक्त पक्राउ परेका छन्। उनीहरूबाट अदालतले तोकेको ८ लाख २७ हजार ४ सय २ रुपैयाँ जरिवाना असुल गरिएको छ भने ४६ वर्ष ४ महिना बराबरको कैद सजाय कार्यान्वयनमा ल्याइएको छ ।
प्रहरीका अनुसार जेठ महिनामा दर्ता भएका १ सय ५२ अपराधमध्ये २६ वटा संगठित तथा आर्थिक अपराधसँग सम्बन्धित रहेका छन्। बैंकिङ कसूर, ठगी तथा अन्य आर्थिक प्रकृतिका घटनाको अनुसन्धानलाई प्राथमिकतामा राखेर काम गरिएको जनाएको छ ।

लागुऔषध नियन्त्रण अभियानमा पनि प्रहरीले उल्लेखनीय सफलता हासिल गरेको छ । ११ वटा मुद्दा दर्ता गर्दै ब्राउन सुगर, गाँजा तथा विभिन्न औषधिजन्य लागू पदार्थ बरामद गरिएको छ । आर्थिक तथा सामाजिक दुवै दृष्टिले असर पार्ने यस्ता अपराध नियन्त्रणले जिल्लाको सुरक्षा वातावरण सुधार्न मद्दत पुगेको प्रहरीको भनाइ छ । अर्कोतर्फ, प्राकृतिक स्रोत तथा राजस्व संरक्षणतर्फ पनि प्रहरी सक्रिय देखिएको छ ।

अवैध वन पैदावार तथा पशुपक्षी ओसारपसार नियन्त्रणका क्रममा ३६ हजार रुपैयाँ राजस्व संकलन भएको विवरणमा उल्लेख छ । प्राकृतिक सम्पदा दोहन नियन्त्रणका क्रममा कारबाही गरिएका सवारीसाधनबाट थप १० हजार रुपैयाँ जरिवाना असुल गरिएको छ । प्रहरीले जेठ महिनाभर सञ्चालन गरेका समुदाय केन्द्रित कार्यक्रमबाट १ हजार ५ सय ५५ जना लाभान्वित भएका छन्। साइबर अपराध, लागूऔषध दुव्र्यसन, महिला हिंसा, बालविवाह तथा ट्राफिक सचेतनासम्बन्धी कार्यक्रममार्फत सामाजिक अपराध न्यूनीकरण र आर्थिक क्षति रोकथाममा सहयोग पुग्ने विश्वास गरिएको छ ।

जिल्ला प्रहरी कार्यालय धनुषाका प्रवक्ता प्रहरी नायब उपरीक्षक मधुसुधन न्यौपाने का अनुसार आर्थिक अपराध नियन्त्रण, फैसला कार्यान्वयन तथा पीडितलाई न्याय दिलाउने अभियान आगामी दिनमा अझ प्रभावकारी रूपमा अघि बढाइनेछ । प्रहरीको तथ्यांकले देखाउँछ कि जेठ महिनामा धनुषामा अपराध नियन्त्रणसँगै आर्थिक अनुशासन कायम गर्न, जरिवाना असुली बढाउन तथा पीडितको रकम फिर्ता गराउन उल्लेखनीय प्रगति भएको छ ।