धनुषामा फरार ८ अभियुक्त पक्राउ, राज्यकोषमा लाखौं रुपैयाँ जरिवाना असुल हुने

1 घन्टा पहिले प्रकाशित

Smrititimes

जनकपुरधाम
असार ३२
विभिन्न मुद्दामा अदालतबाट कैद तथा जरिवाना सजाय सुनाइएपछि फरार रहेका ८ जना प्रतिवादीलाई धनुषा प्रहरीले पक्राउ गरेसँगै राज्यकोषमा लाखौं रुपैयाँ जरिवाना असुली हुने सम्भावना बढेको छ।

जिल्ला प्रहरी कार्यालय धनुषाले अदालतको फैसला कार्यान्वयन अभियानअन्तर्गत फरार प्रतिवादीहरूको खोजतलास गर्ने क्रममा उनीहरूलाई पक्राउ गरी आवश्यक कानुनी कारबाहीका लागि जिल्ला अदालत धनुषामा पेश गरेको जनाएको छ।

प्रहरीका अनुसार पक्राउ परेकामध्ये चोरी मुद्दाका दुई प्रतिवादीबाट मात्र २ लाख ८० हजार रुपैयाँ जरिवाना असुल हुनुपर्नेछ। वन पैदावर ओसारपसार मुद्दाका दुई प्रतिवादीबाट थप १ लाख ९२ हजार ५९४ रुपैयाँ जरिवाना उठ्नेछ। त्यसैगरी लागूऔषध, सवारी ज्यान तथा कुटपिट–लुटपिट मुद्दाका प्रतिवादीहरूबाट समेत अदालतले तोकेको जरिवाना असुल गरिनेछ।

प्रारम्भिक हिसाबअनुसार पक्राउ परेका प्रतिवादीहरूबाट कम्तीमा ४ लाख ८२ हजार रुपैयाँभन्दा बढी जरिवाना राज्यकोषमा जम्मा हुने देखिएको छ। यससँगै उनीहरूले तोकिएको कैद सजायसमेत भोग्नुपर्नेछ।

अदालतका फैसला कार्यान्वयन अभियानले फरार अभियुक्त पक्राउ मात्र नभई राज्यको राजस्व असुलीमा समेत योगदान पु¥याउने देखिएको छ। लामो समयदेखि उठ्न बाँकी रहेका जरिवाना रकम संकलन हुन थालेपछि न्यायिक निर्णयको कार्यान्वयन प्रभावकारी बन्नुका साथै सरकारी आम्दानीमा पनि सकारात्मक प्रभाव पर्ने अपेक्षा गरिएको छ।

धनुषा प्रहरीले अदालतका फैसला कार्यान्वयनलाई थप प्रभावकारी बनाउन फरार प्रतिवादीको खोजी तथा पक्राउ अभियानलाई निरन्तरता दिने जनाएको छ।