विदेह नगरपालिकामे सामुदायिक विपद् प्रतिकार्य प्रशिक्षण सम्पन्न

5 दिन पहिले प्रकाशित

Smrititimes

जनकपुरधाम, साउन २० : विदेह नगरपालिकामे बुधदिन विष्णुदल गण, महेन्द्रनगरक नेपाल आर्मीक टोलीद्वारा सामुदायिक विपद् प्रतिकार्यसम्बन्धी एकदिने प्रशिक्षण कार्यक्रम सफलतापूर्वक सम्पन्न भेल। कार्यक्रमक अध्यक्षता नगर प्रमुख बेचन दास कएलनि।

प्रशिक्षण कार्यक्रमक उद्घाटनसँ शुरुआत भेल, जाहिमे नगर उपप्रमुख आशा देवी झा, विपद् व्यवस्थापन समितिक अध्यक्ष सञ्जय पाण्डे, बी.ओ.पी. महिनाथपुरक प्रमुख, नगरपालिकाक कर्मचारी, विभिन्न विद्यालयक शिक्षक आ विद्यार्थीसभक उल्लेखनीय सहभागिता रहल।

नेपाल आर्मीक प्रशिक्षकसभक अनुसार प्रशिक्षणक मुख्य उद्देश्य प्राकृतिक तथा मानवनिर्मित विपद्सँ बचाव, जोखिम न्यूनीकरण, विपद्सँ पहिने करए योग्य तयारी, विपद्क समय सुरक्षा उपाय आ उद्धारसम्बन्धी आधारभूत जानकारी समुदायक लोकसभ धरि पहुँचेनाइ छल।

प्रशिक्षणक क्रममे विपद् व्यवस्थापन, प्राथमिक उपचार, सुरक्षित उद्धार, आपत्कालीन अवस्थामे अपनाबय योग्य सावधानी तथा समुदायक भूमिकासम्बन्धी व्यावहारिक अभ्यास सेहो कराओल गेल।

कार्यक्रममे सम्बोधन करैत नगर प्रमुख बेचन दास कहलनि जे विपद् व्यवस्थापनमे समुदायक तैयारी आ जनचेतना सभसँ महत्वपूर्ण पक्ष अछि। हुनक अनुसार एहि प्रकारक प्रशिक्षणसँ नागरिकसभ विपद्क सामना करबाक लेल सक्षम बनैत छथि।

विदेह नगरपालिकाक तर्फसँ जनाओल गेल जे आगामी दिनसभमे सेहो विपद् जोखिम न्यूनीकरण तथा समुदायक क्षमता अभिवृद्धिक लेल एहन सचेतनामूलक कार्यक्रम निरन्तर सञ्चालन कएल जाएत।