प्रधानमन्त्रीले राजनैतिक बेइमानी गरेको कांग्रेसको ठहर, सरकारलाई दिएकाे समर्थन आजै फिर्ता लिने

7 महीना पहिले प्रकाशित

Smrititimes

काठमाडौं, फागुन २४ : प्रधानमन्त्री पुष्पकमल दाहालले राजनैतिक बेइमानी गरेको ठहर कांग्रेसले गरेको छ।

बिहीबार बसेको नेपाली कांग्रेस संसदीय दलको बैठकले प्रधानमन्त्री पुष्पकमल दाहालले राजनैतिक बेइमानी गरेको भन्दै सरकारलाई दिएको समर्थन फिर्ता लिने निर्णय पनि गरेको छ।

समर्थन फिर्ताको निर्णयको जानकारी आजै सभामुख गराउने मुख्य सचेतक रमेश लेखकले बताए।

आज सिंहदरबारमा बसेको बैठकले प्रधानमन्त्री पुष्पकमल दाहाल प्रचण्डले राजनीतिक बेइमानी गरेकाले समर्थन फिर्ता लिने निर्णय भएको मुख्य सचेतक रमेश लेखकले बताए।

संविधानको रक्षा, गणतन्त्रात्मक व्यवस्थाको सुदृढीकरण, सुशासन विकास र स्थिरिताका लागि गठबन्धन गरेर चुनावमा गएको र त्यसक्रममा भएको सहमतिप्रति आफू प्रतिबद्ध रहेको बेला प्रधानमनत्रीले अविश्वसनीय ढंगले गठबन्धन तोडेको कांग्रेसको निष्कर्ष छ।

मुख्य सचेतक लेखकले कांग्रेस संविधानको रक्षा र व्यवस्थालाई सुदृढ गर्न गठबन्धन गरेपछि प्रधानमन्त्रीले विश्वासघात गरेर गठबन्धन तोडेको बताए।

‘प्रचण्डले विश्वास घात गरेर गठबन्धन तोडे, काल्पनिक कपोलकल्पित तथा कथित कारण देखाउनुभयो । हामीले यसलाई राजनीतिक बेइमानीका रूपमा लिएका छौँ,’ उनले भने, ‘हामीले सहमतिहरू पालना गर्दै गयौँ। उहाँले अविश्वसनीय ढंगले गठबन्धन भत्काउनु भयो।’

प्रधानमन्त्रीले गठबन्धन भत्काएर मुलुकलाई अस्थिरता र अनिश्चितता तर्फ लगेको लखकले बताए।

अब कांग्रेसले संघीय संसदमा प्रमुख विपक्षी दलका हैसियतले रचनात्मक प्रतिपक्षको भूमिका निर्वाह गर्ने उनले बताए।

‘हामीले हाम्रा सांसदहरुलाई संसदमा देश जनताका हितमा प्रधावकारी रुपमा प्रस्तुत हुन र रचनात्मक प्रतिपक्षको भूमिका निर्वाह गर्न निर्देश गरेका छौं,’ प्रमुख सचेतक लेखकले भने।

साभार : काठमाडौं प्रेस