जनकपुरधाममा भएको तेक्वान्दो दोजाङ ग्रेडिङमा बिद्यार्थीको आशलाग्दो सहभागिता

3 महीना पहिले प्रकाशित

Smrititimes

जनकपुरधाम
भदौँ १५ गते ।
खेलकुद प्रति विद्यार्थीहरुको ध्यानाकर्ष गर्ने उद्देश्यले जनकपुरधाम शनिबार सम्पन्न भएको तेक्वान्दो ग्रेडिङ परिक्षामा तेक्वानदोको विद्यार्थीहरुको उल्लेख्य सहभागिता देखिएको छ । जनकपुरधामको अपाङग संघको प्राङगनमा भएको बेल्ट ग्रेडिङ परिक्षामा ५५ जना तेक्वानदो खेलका विद्यार्थीहरुको सहभागिता रहेको थियो ।

ममता तेक्वान्दो दोजाङको आयोजनामा भएको बेल्ट परिक्षामा बोल्दै नेपाल तेक्वान्दो एसोसिएसन ललितपुरका गुरु तिलक लामाले स्वास्थ्यको लागि खेलकुद तथा राष्ट्रको लागि खेलकुद अभियान अन्तर्गत विद्यार्थी भाइ बहिनीहरुलाई स्वस्थ, फुर्तिला र तन्दुरुस्त रहन यो खेलले सघाउने भएकाले विद्यार्थीहरुको यो खेल प्रतिको आकर्षण बढेको बताउनु भयो ।

उहाँले खेलकुदको माध्यमले आफु र देश दुबैको नाम चर्चित गर्न सकिने भएकाले युवाहरुलाई कराँते खेल प्रति चासो बढाउनु पर्ने आवश्यक्ता प्रति जोड दिनुभयो । उहाँका अनुसार तेक्वान्दो खेल्दा खेलाडीहरुमा सेल्फ डिफेन्स क्षमताको विकास हुनुका साथै आत्मविश्वास बढ्नु, टीमवर्क, नेतृत्व, जवाफदेहिता सिकाउन मद्दत गर्दछ । उक्त बेल्ट परिक्षामा मुख्य प्रशिक्षक गुरु उमेश साह तथा गुरु कृष्णा कुमार मण्डलको सहभागिता रहेको थियो । उक्त बेल्ट परिक्षामा सहभागी भएका खेलाडीहरुको खेलको आधारमा विभिन्न बेल्ट प्रदान गरिएको आयोजकले जनाएको छ ।