बटुकनाथ झा
जनकपुरधाम
असोज ६ गते ।
आईतबार जिल्ला ट्राफिक प्रहरी कार्यालय धनुषामा भएको पत्रकार सम्मेलनमा ट्राफिक निरिक्षक हरि बहादुर वलीले गत जेठ देखि भदौँ सम्म ४ महिनामा १० हजार ८ सय २९ जनाबाट ९१ लाख ९२ हजार ५ सय जरिवाना राजश्व संकलन भएको जानकारी गराउनु भयो ।

गत आर्थिक वर्षमा ट्राफिक नियम विपरित काम गर्ने २९ हजार ६५ जनालाई कारबाही गर्दा २ करोड ३४ लाख ५१ ह्जार ५०१, आ.ब. २०७९–८० मा ३८ हजार ४ सय ४९ जनालाई कारबाही गर्दा २ करोड ६० लाख एक हजार तथा आ.ब. २०७८–०७९ मा २४ हजार ७ सय ८८ जनालाई कारबाही गर्दा एक करोड ९७ लाख ५६ हजार राजश्व संकलन भएको जानकारी दिनुभयो । यो तथ्यांकको आधारमा धनुषा जिल्लामा वर्षेणी ट्राफिक नियम विपरित काम गर्नेहरुबाट राजश्व संकलनको क्रम बढी रहेको देखिन्छ । पत्रकार सम्मेलनमै दिइएको जानकारी अनुसार सवारी दुर्घटनामा कमि आएको तथ्यांक सार्वजनिक गरिएको छ ।

आर्थिक वर्ष २०८०– ८१ मा ७४ जनाको सडक दुर्घटनामा मुत्यु भएको छ भने आर्थिक वर्ष २०७९–०८० मा ८४ जना तथा आर्थिक वर्ष २०७८–७९ मा एक सय ५ जनाको मृत्यु भएको थियो । ट्राफिक निरिक्षक वलीका अनुसार धनुषामा हुने सडक दुर्घटनाहरु मध्ये ७० प्रतिसत मोटरसाइकलबाट दुर्घटना हुने गरेका छन् । गत आर्थिक वर्षमा धनुषा जिल्लाको स्थानीय तह अनुसार सवारी दुर्घटनामा मृत्युहुनेहरुको तथ्यांकका आधारमा सबै भन्दा बढी १९ जनाको मृत्यु मिथिला नगरपालिका क्षेत्रमा भएको छ ।

जनकपुरधाम उपमहानगरपालिका र धनुषाधाम नगरपालिकामा ११–११ जना, लक्ष्मिनियाँ गापामा ६ जना, सबैला र विदेह नपामा ५–५ जना ,क्षिरेश्वरनाथ नपामा ४ जना, बटेश्वरमा २ जनाको सडक दुर्घटनामा मृत्यु भएको जनाइएको छ । ट्राफिक निरिक्षक वलीले जिल्लामा ३७ जनाको दरबन्दी भएपनि राजधानी भएकाले कामको चापका आधारमा अन्य जिल्लाबाट समेत ट्राफिक प्रहरी ल्याई ७२ जनाबाट ट्राफिक व्यवस्थापनको काम भईरहेको जानकारी दिनुभयो ।

पछिल्लो समयमा जनकपुरधाम नगरक्षेत्र भित्र हुने गरेको छाडा चौपाया नियन्त्रण,ईरिक्सा व्यवस्थापन तथा फुटपाथ व्यवस्थापनको काम फितलो देखिएकाले जनकपुरधाम उपमहानगरपालिका तथा ट्राफिक प्रहरीको आलोचना समेत भईरहेको छ । यस्ता गतिविधिलाई नियन्त्रण गर्न आम जनसमुदायको समेत सहयोगको आवश्यक्ता रहेको धनुषाका ट्राफिक प्रहरी निरिक्षक वलीले जानकारी दिनुभयो ।

कमेन्ट गर्नुहोस्

12 comments

Leave Us A Comment

Search