जेठ ३ गते
जनकपुरधाम । कर्ण कायस्थ महिला समाज जनकपुरले ६ जना महिलालाई सिलाई मेसिन वितरण गरेको छ ।
समाजले आर्थिक रुपले विपन्न ६ जना महिलालाई शुक्रवार एक कार्यक्रमको आयोजना गरी सपना फाउण्डेशन र समाजको केन्द्रीय कार्यालयबाट प्राप्त सहयोगमा उक्त मेसिन वितरण गरेको हो ।
कर्ण कायस्थ महिला समाजकी केन्द्रीय अध्यक्ष पुनम दासको प्रमुख आथित्यमा भएको उक्त कार्यक्रममा अमृता कर्ण, रुबी कर्ण, रञ्जना कर्ण, रीना पण्डित, लिलम देवी र मनटुटिया देवीलाई मेसिन हस्तान्तरण गरियो ।
मेसिन हस्तान्तरण गर्दै समाजकी केन्द्रीय अध्यक्ष दासले महिला आर्थिक रुपले सम्पन्न र आत्मनिर्भर भएपछि घरपरिवार चलाउन सहज हुने बताइन् ।
समाजको जनकपुरकी अध्यक्ष नुतन कर्णले विपन्न र आर्थिक रुपले असक्षम ३ जना कायस्थ समुदायका र ३ जना अन्य समुदायका महिलालाई उनीहरूको आर्थिक स्थिति सुधार्न सहयोग हुने अपेक्षाका साथ मेसिन वितरण गरिएको बताइन् ।
उनले घर परिवार चलाउन मुस्किल र आर्थिक रुपले कमजोर महिलाहरूलाई मेसिन दिने विषयमा समाजमै छलफल गरेर ती ६ जना महिला छनोट गरिएको जानकारी दिइन् ।
उनले मेसिन वितरण गर्दा ती महिलाहरूको आम्दानीको अवस्था कस्तो छ, कसरी काम हुँदैछ र के के समस्या भइरहेको छ ती विषयमा पनि हामीले रेकर्ड राख्ने बताइन् । जसले गर्दा आगामी दिनमा कसरी अघि बढ्ने त्यसले समाजलाई पनि योजना बनाउन सहज हुने उनको भनाइ छ ।
साथै उनले कर्ण कायस्थ महिला समाजले कायस्थ समाजको लागि मात्रै नभई अन्य समुदायका महिलाहरूका लागि पनि काम गर्ने उदाहरण प्रस्तुत गर्नका लागि समावेशी रुपमा यो मेसिन वितरण गरिएको बताइन् ।
उनले सपना फाउण्डेशनले १० वटा मेसिन उपलब्ध गराएको र बाँकी रहेको ४ वटा मेसिन पनि चाँडै जनकपुरबाहेक अन्य स्थानमा वितरण गरिने बताइन् ।

सिलाई मेसिन पाएपछि मनटुटिया देवीले खुशी व्यक्त गरिन् । शारीरिक रुपले अशक्त रहेकी उनले मेसिनले अब जीवन फेर्ने र आर्थिक रुपले सक्षम हुन सहयोग पुग्ने विश्वास व्यक्त गरिन् । उनले सिलाईको कामबाट भएको आम्दानी घरपरिवारको खर्च धान्न सहज हुने भन्दै कर्ण कायस्थ महिला समाजलाई धन्यवाद व्यक्त गरिन् ।

त्यस्तै रुपैठाकी लिलमदेवीले पनि मेसिन उपलब्ध गराएकोमा समाजलाई धन्यवाद दिइन् । ७ जना छोरी मात्रै रहेको र श्रीमान्को पनि रोजगारी नभएको अवस्थामा समाजले दिएको सिलाई मेसिनले घरको खर्च धान्न सहज हुने बताइन् ।

कमेन्ट गर्नुहोस्

12 comments

Leave Us A Comment

Search