युवा सङ्घ नेपालको धनुषा–काठमाडौँ अन्तर जिल्ला कमिटीको अध्यक्षमा सुशिल श्रेष्ठ

6 महीना पहिले प्रकाशित

Smrititimes

काठमाडौँ ।

साउन १६ गते
राष्ट्रिय युवा सङ्घ नेपालको धनुषा–काठमाडौँ अन्तर जिल्ला कमिटीको अध्यक्षमा सुशिल श्रेष्ठ सर्वसम्मतिले चयन भएका छन् ।

शुक्रवार राष्ट्रिय युवा सङ्घ नेपालका केन्द्रीय महासचिव महेश चौलागाईँको प्रमुख आतिथ्यमा सम्पन्न दोस्रो अधिवेशनबाट अध्यक्ष श्रेष्ठको नेतृत्त्वमा १५ सदस्यीय कमिटी पनि निर्विरोध निर्वाचित भएका छन् ।

जसमा उपाध्यक्षमा रविन्द्र महरा, सचिवमा अभिषेक कुमार सिंह, उप सचिवमा युवराज सिंह, उप सचिव महिला तर्फ कौशिल्या सुनुवार, कोषाध्यक्षमा आशिष कर्ण रहेका छन् । कमिटीका युथ फोर्स प्रमुख र साइवर सर्कल प्रमुखको जिम्मेवारी पछि तोकिने बताइएको छ ।

त्यसैगरी सदस्यहरूमा राहुल ठाकुर, शुभम चौधरी, आलोक झा, निशान चौधरी, उद्धव झा, आदित्य पाण्डे र गौतम मण्डल रहेका छन् ।

कार्यक्रमका प्रमुख अतिथि चौलागाईँले युवा बिना देशको कुनैपनि क्षेत्रमा परिवर्तन सम्भव नरहेकाले युवालाई हरेक क्षेत्रमा सक्रियताका साथ लाग्न आग्रह गरे ।

उनले धनुषा जिल्लाले राजनीतिक क्षेत्रमा गरेको योगदानमा युवाको भूमिका महत्त्वपूर्ण रहेकाले निर्वाचित नयाँ कमिटीले थप उर्जाका साथ युवा सङ्घको उदेश्य पूर्ति गर्ने विश्वास व्यक्त गरे ।

उनले युवा सङ्घले देशको समृद्धि र विकासका लागि आफ्ना विचार खुलेर राख्ने गरेको भन्दै युवा अवस्था भनेको हरेक काम कुरा गर्न सक्ने आँटिलो उमेर रहेकाले त्यसको सहि सदुपयोग गर्न पनि आग्रह गरे ।
त्यस्तै कार्यक्रममा राष्ट्रिय युवा सङ्घ नेपालका सचिवालय सदस्य तथा अन्तर जिल्ला विशेष प्रदेश कमिटी इन्चार्ज गणेश योङहाङ, राष्ट्रिय युवा सङ्घ नेपालका सचिवालय सदस्य तथा कार्यालय विभाग प्रमुख राजु तिवारीले शुभकामना मन्तव्य राखेका थिए ।