अहिंसा मध्यस्थता सहमति निर्माण सम्बन्धी दुई दिने तालिम सम्पन्न

4 महीना पहिले प्रकाशित

Smrititimes

जनकपुरधाम
चैत १९ गते ।
नेपालमा शान्तिपुर्ण र समावेशी समुदायको लागि धनुषा र महोत्तरीका दुई जिल्लामा संचालनमा रहेको सशक्तिकरण परियोजना अन्तरगत अहिंसा मध्यस्थता सहमति निर्माण सम्बान्धी दुई दिने तालिम ढल्केवरमा सम्पन्न भएको छ । सपोर्ट नेपालको आयोजना तथा कुर्वे उस्त्रोेको सहयोगमा संचालित सशक्तिकरण परियोजना अन्तरगत धनुषाको धनौजी गाउँपालिका तथा महोत्तरीका मटिहानी नगरपालिका अन्तरगत गठन भएका टोल विकास संस्थाका पदाधिकारीहरुलाई सो तालिममा सहभागी गराइएको परियोजनाका धनुषा संयोजक शत्रुघन महतो जानकारी दिनुभयो । तालिममा सहभागी भएकाहरुलाई प्रशिक्षक शोभा रेग्मीले टोल छिमेकमा हुने विवादहरुलाई अहिंसा मध्यस्थता गरी शान्ति प्रक्रियाद्वारा सहमती निर्माणका लागि खेल, अभ्यास, नाटक मार्फत प्रशिक्षण दिनुभएको थियो ।

समाजमा हुने द्वन्द्वलाई टोल विकास संस्थाको माध्यमले समाधान गर्ने विषयमा सहभागीहरुलाई प्रशिक्षण दिनुभएको थियो । सो तालिममा धनुषाको धनौजी गाउँपालिका अन्तरगत भैरब टोल विकास संस्था तथा सल्हेश टोल विकास संस्था एवम् महोत्तरीको मटिहानी नगरपालिका अन्तरगतका बजार टोल विकास संस्था तथा रामजानकी टोल विकास संस्थाका १२ जना महिला सहित २४ जनालाई प्रशिक्षण दिइएको थियो ।

उक्त तालिममा दुबै पालिकामा संचालनमा रहेको नागरिक सहायता कक्षका संयोजक एवम् महिला वालवालिका तथा ज्येष्ठ नागरिक शाखाका संयोजकहरुलाई सहभागि गराइएको थियो । सो तालिममा सहयोगी कुर्वे उस्त्रोका प्रतिनिधि सहित सपोर्ट नेपालका सल्लाहका रोशना खड्का,कार्यवाहक अध्यक्ष सुनिल कुमार मल्लिक, कोषाध्यक्ष कविता थापा,सदस्य गंगा प्रसाद साह ,कार्यक्रम संयोजक सरस्वती शेर्पा,सशक्तिकरण परियोजनाका महोत्तरीका कार्यक्रम संयोजक प्रकाश ठाकुर तथा धनुषाका कार्यक्रम संयोजक शत्रुघन महतो लगायतको सहभागिता रहेको थियो ।