भंगहा नगरपालिकामा बाल अधिकार संरक्षण कार्यविधि मस्यौदामाथि छलफल तथा निर्णय

4 महीना पहिले प्रकाशित

Smrititimes

जनकपुरधाम
चैत २६ गते । महोत्तरीको भंगहा नगरपालिकामा संचालित एकीकृत सामुदायिक विकास परियोजना अन्तरगत बुधबार बाल संरक्षण कार्यविधिको मस्यौदा माथि छलफल गरिएको छ । गुड नेवर्स इन्टरनेसनल नेपालको आर्थिक तथा प्राविधिक सहयोग र दलित समाज उत्थान समिति नेपालको सहजीकरणमा सञ्चालित एकीकृत सामुदायिक विकास परियोजना अन्तर्गत भंगहा नगरपालिकामा आयोजना एक महत्वपूर्ण बैठक सम्पन्न भएको छ ।
उक्त बैठक नगरपालिकाको समन्वयमा नगर प्रमुख, उपप्रमुख, सम्बन्धित सरोकारवाला निकायका प्रतिनिधिहरू, बाल क्लबका प्रतिनिधि, प्रहरी तथा परियोजना कर्मचारीहरूको सहभागितामा बसेको थियो। बैठकमा “भंगहा नगर बाल अधिकार संरक्षण कार्यविधि, २०८२” को मस्यौदामाथि विस्तृत छलफल गरिएको परियोजनाका फिल्ड अफिसर अञ्जय ठाकुरले जानकारी दिनुभयो । सरोकारवालाबाट प्राप्त सुझावहरू समावेश गर्दै कार्यविधिलाई अन्तिम रूप दिने सहमति भएको छ । साथै, सो कार्यविधिलाई आगामी नगर कार्यपालिकाको बैठकमा औपचारिक रूपमा पेस गर्ने निर्णय समेत गरिएको छ। यसका अतिरिक्त, भंगहा नगरपालिकामा गठन गरिने बाल क्लबहरू पनि यही कार्यविधि अनुसार सञ्चालन तथा व्यवस्थापन गर्ने निर्णय बैठकले गरेको छ ।यो निर्णयले नगर क्षेत्रमा बाल अधिकार संरक्षण, बाल सहभागिता तथा संस्थागत विकासलाई थप प्रभावकारी बनाउने अपेक्षा गरिएको ठाकुरले जानकारी दिनुभयो ।