तरहीमा टोल विकास संस्था गठन

53 मिनट पहिले प्रकाशित

Smrititimes

जनकपुरधाम
जेठ २ गते ।
धनुषाको धनौजी गाउँपालिका वडा नं. ४ तरहीमा स्थानीय विकास र समुदायिक एकतालाई सुदृढ बनाउने उद्देश्यसहित “महारानी माई टोल विकास संस्था” गठन गरिएको छ ।
वडा अध्यक्ष रामसोभित मंडलको अध्यक्षतामा भएको स्थानीयबासीहरुको भेलाबाट ११ सदस्यीय समिति सर्वसम्मत रूपमा चयन गरेको हो । समितिका संयोजकमा राजकुमार मंडल, सहसंयोजकमा रिमल देवी, सचिवमा शिव मंडल तथा कोषाध्यक्षमा सुधिरा देवी चयन भएका छन् भने सदस्यहरूमा रामतोला देवी,ललिता देवी,ममता कुमार मंडल,पुनिता देवी,मालती देवी, भोला मंडल धानुक तथा शिवजी मंडल रहेका छन् ।
सपोर्ट नेपालका धनुषा जिल्ला कार्यक्रम संयोजक सत्रुघन महतोका अनुसार स्थानीय सरकार सञ्चालन ऐन २०७४ अन्तर्गत विभिन्न समुदायका स्थानीयवासीको भेलाबाट संस्था गठन गरिएको हो । संस्था सपोर्ट नेपालको आयोजना तथा कुर्वे उस्ट्रोको सहयोगमा सञ्चालित सशक्तिकरण परियोजना अन्तर्गत गठन गरिएको बताइएको छ ।
संस्था गठनपछि पदाधिकारीहरूसँग आगामी कार्ययोजना तथा संस्थाको वैधानिक प्रक्रियाका विषयमा छलफल गरिएको सपोर्ट नेपालका महोत्तरीका कार्यक्रम संयोजक प्रकाश ठाकुरले जानकारी दिनुभयो । उहाँका अनुसार संस्थाको कार्यविधि तयार गरी सम्बन्धित पालिकाबाट स्वीकृत गराउने, विधान निर्माण तथा पारित गर्ने र वडा कार्यालयको सिफारिसपछि पालिकामा दर्ता गराउने निर्णय बैठकले गरेको छ । कार्यक्रममा सपोर्ट नेपालका गंगाप्रसाद साह, धनौजी गाउँपालिकामा स्थापना भएको नागरिक सहायता कक्षका कर्मचारी बिणा मंडलसहित स्थानीय बासिन्दाको उल्लेखनीय सहभागिता रहेको थियो ।
नवगठित टोल विकास संस्थाले समुदायमा शान्ति, सद्भाव, सुरक्षा र सहिष्णुता कायम गर्न सहयोग गर्ने, विकास निर्माणका योजना तर्जुमा तथा अनुगमनमा सहकार्य गर्ने, धार्मिक तथा सांस्कृतिक कार्यक्रम व्यवस्थापन गर्ने, सार्वजनिक कामको निगरानी गर्ने लगायतका २९ प्रकारका जिम्मेवारी निर्वाह गर्ने जनाइएको छ । स्थानीयस्तरमा विकास र सहकार्यलाई प्रभावकारी बनाउन संस्था वडा कार्यालयमा दर्ता गरी वडासँग समन्वय गरेर अगाडि बढ्ने निर्णयसमेत गरिएको आयोजकले जनाएको छ ।