सवैला नगरपालिकाको प्रारम्भिक बाल विकास तथा संरक्षण रणनीति मस्यौदामाथि छलफल सम्पन्न

3 महीना पहिले प्रकाशित

Smrititimes

जनकपुरधाम
जेठ २६ गते । सवैला नगरपालिकाको प्रारम्भिक बाल विकास तथा संरक्षण रणनीतिको मस्यौदामाथि समीक्षा तथा छलफल कार्यक्रम सम्पन्न भएको छ। योजना इन्टरनेशनल नेपालको साझेदारी तथा जानकी महिला जागरण समाज –ज्वास) द्वारा सञ्चालित सशक्त बालिका परियोजना अन्तर्गत उक्त कार्यक्रम आयोजना गरिएको हो ।
कार्यक्रममा प्रारम्भिक बाल विकास तथा संरक्षण रणनीतिको मस्यौदामा समावेश गरिएका विषयवस्तुहरूमाथि विस्तृत छलफल गरिएको थियो । सहभागीहरूले मस्यौदामा उल्लेखित व्यवस्था, लक्ष्य, उद्देश्य तथा कार्यान्वयन पक्षका विषयमा सुझाव प्रदान गरेका थिए। छलफलका क्रममा प्राप्त सुझावहरूलाई समेट्दै मस्यौदामा आवश्यक परिमार्जन, तथ्यांकको शुद्धीकरण तथा थप विषयवस्तु समावेश गर्ने निर्णय गरिएको छ ।
नगरपालिकाका विभिन्न विषयगत शाखाका प्रमुखहरूले आ–आफ्नो कार्यक्षेत्रसँग सम्बन्धित अद्यावधिक तथ्यांक, सूचना तथा आवश्यक सुझावहरू उपलब्ध गराउने प्रतिबद्धता व्यक्त गरेका थिए। साथै, रणनीतिलाई थप परिष्कृत गरी विधायन समितिमा छलफलका लागि पेश गर्ने र समितिको सिफारिस पश्चात आगामी कार्यपालिका बैठकबाट पारित गर्ने निर्णय समेत गरिएको छ ।
कार्यक्रममा नगर प्रमुख, कार्यपालिका सदस्यहरू, विषयगत शाखाका प्रमुखहरू, स्वास्थ्यकर्मी, महिला स्वास्थ्य स्वयंसेविका, बाल विकाससँग सम्बन्धित सरोकारवालाहरू तथा योजना इन्टरनेशनल नेपाल, सेतो गुराँस राष्ट्रिय बाल विकास सेवा र जानकी महिला जागरण समाजका प्रतिनिधिहरूको सहभागिता रहेको थियो।
सहभागीहरूले प्रारम्भिक बाल विकास क्षेत्रमा स्थानीय सरकारको स्पष्ट रणनीति निर्माण हुनुले बालबालिकाको समग्र विकास, संरक्षण तथा गुणस्तरीय सेवामा पहुँच सुनिश्चित गर्न महत्वपूर्ण योगदान पुग्ने विश्वास व्यक्त गरेका थिए। कार्यक्रमको समापनमा रणनीतिलाई यथाशीघ्र अन्तिम रूप दिई कार्यान्वयनमा लैजान सबै पक्षले सहकार्य गर्ने प्रतिबद्धता जनाएका थिए ।