जनकपुरधाममा होटल, रेष्टुरेन्ट तथा रिसोर्टमा संयुक्त अनुगमन, म्याद गुज्रेका खाद्य पदार्थ फेला

2 महीना पहिले प्रकाशित

Smrititimes

जनकपुरधाम,
असार १० गते
खाद्य प्रविधि तथा गुण नियन्त्रण कार्यालय, जनकपुरधामले होटल, रेष्टुरेन्ट तथा बजार क्षेत्रको संयुक्त अनुगमनका क्रममा विभिन्न खाद्य स्वच्छता सम्बन्धी कमजोरी फेला पारेको छ ।
बुधबार अनुगमनका क्रममा जनकपुरधामको रमणन्द चोकस्थित मिथिला थालीमा म्याद समाप्त भएको १०० ग्रामको एक प्याकेट बेकिङ पाउडर फेला परेको थियो। साथै, किचनको सरसफाइमा कमी रहेको र खाद्य सामग्री व्यवस्थित रूपमा भण्डारण नगरिएको पाइएको कार्यालयले जनाएको छ।

अनुगमनमा खटिएका खाद्य निरीक्षक प्रविण कुमार तिवारीले म्याद गुज्रेका खाद्य पदार्थ प्रयोग नगर्न, किचनको सरसफाइमा विशेष ध्यान दिन तथा खाद्य स्वच्छता तथा गुणस्तर ऐन, २०८१ बमोजिम खाद्य स्वच्छता कायम गर्न निर्देशन दिनुभयो ।
त्यसैगरी, क्षीरेश्वरनाथ नगरपालिका–१, रमदैयास्थित जानकी फन पार्क एण्ड रिसोर्ट प्रालिमा गरिएको अनुगमनका क्रममा लेबल नभएका पाउरोटीका तीन प्याकेट तथा म्याद गुज्रेको डीडीसी दूधका आधा लिटरका छ वटा प्याकेट फेला परेका थिए।
अनुगमन टोलीले रिसोर्ट सञ्चालकलाई लेबल नभएका तथा म्याद गुज्रेका खाद्य पदार्थ नष्ट गर्न लगाएको थियो। साथै, खाद्य निरीक्षक प्रमोद बुढाथोकीले खाद्य स्वच्छता तथा गुणस्तर ऐन, २०८१ अनुसार खाद्य स्वच्छता कायम गर्न, फ्रिजमा खाद्य पदार्थ भण्डारण गर्दा शाकाहारी, मांसाहारी, पाकेका तथा नपाकेका खाद्य पदार्थ छुट्टाछुट्टै राख्न तथा सबै खाद्य सामग्रीमा लेबलिङ गरी व्यवस्थित भण्डारण गर्न निर्देशन दिनुभयो ।
उपभोक्ता हित संरक्षण मञ्चको समन्वयमा सम्पन्न उक्त अनुगमनमा धनुषाका सहायक प्रमुख जिल्ला अधिकारी कृष्ण गैरे, खाद्य अनुसन्धान अधिकृत रमेश कुमार दाहाल, उपभोक्ता हित संरक्षण मञ्चका केन्द्रीय सदस्य तथा पत्रकार बटुकनाथ झा, जिल्ला प्रहरी कार्यालय धनुषाका प्रहरी सहायक निरीक्षक विन्दाराय यादव लगायतको सहभागिता रहेको थियो ।
खाद्य प्रविधि तथा गुण नियन्त्रण कार्यालयले उपभोक्ताको स्वास्थ्य सुरक्षा सुनिश्चित गर्न यस्ता अनुगमनलाई निरन्तरता दिने जनाएको छ।