मुरलीसरके अतिक्रमण हटाब हुलाक मार्फत भेल गुठी कार्यालयमे निवेदन दर्ता

1 घन्टा पहिले प्रकाशित

Smrititimes

जनकपुरधाम
साउन ११ ।
धार्मिक तथा साँस्कृतिक दृष्टिकोण सँ अत्यन्त महत्वपुर्ण जनकपुरधाम–४ स्थित मुरलीसरके अतिक्रमण हटाबऽ सोमदिन गुठी कार्यालय जनकपुरधाममे निवेदन दर्ता भेल अछि । स्थानीय चन्द्रमोहन चौरधी मुरलीसर पोखरिके मोहार, पोखरि तथा गुठी स्वामित्वक कि.नं. ९३ अन्तर्गत रहल माँ दुर्गा मन्दिर आ श्रीकृष्ण मन्दिरक भोगक जग्गा अतिक्रमणमुक्त कराबयक माग करैत आइ गुठी संस्थान शाखा कार्यालय, जनकपुरमे निवेदन दर्ता कराबय पहुँचल छलाह।
हुनकर आरोप अनुसार कार्यालय प्रमुख किशोरकुमार झा निवेदन दर्तामे आनाकानी केलनि । जाहिक बाद ओ धनुषास्थित जनकपुर हुलाक कार्यालयमार्फत अपन निवेदन गुठी शाखा कार्यालय जनकपुर पठौने छथि । संस्थानक प्रमुख झा अखन गुठी अपन प्रक्रीया अनुसार काज करहल कहैत अखन ओहि सन्दर्भमे निवेदन लक कोनो फायदा नहि हेतइ से कहैत निवेदन नइ लेने छलाह ।
चौरधीक अनुसार गुठी संस्थान शाखा जनकपुरद्वारा २०८३ साउन २–३ गते मुरलीसर पोखरि आ ओकर मोहार छुट्याबय लेल कयल गेल नापजाँच त्रुटिपूर्ण छल । हुनकर दावी अछि जे गुठीक स्वयं २०६२ चैत ६ गतेक नापजाँच प्रतिवेदनक आधार पर मुरलीसर पोखरि, पोखरिक डिल(भीर) तथा गुठीक जग्गा(जमिन) अतिक्रमणमुक्त होयबाक चाही।
निवेदनमे उल्लेख कयल गेल अछि जे तत्कालीन गुठियार मिथिलेश मिश्रद्वारा २०४४ सालक नापीक क्रममे कि.नं. ९३ अन्तर्गत रहल माँ दुर्गा मन्दिर आ श्रीकृष्ण मन्दिरक जग्गाक अवस्थिति परिवर्तन कयल गेल ।
हुनकर आरोप अछि जे मूल रूपसँ पोखरिक दक्षिण भागमे रहल मन्दिरक जग्गाके नापजाँचमार्फत उत्तर दिशामे धकेलल गेल तथा मन्दिरक आगाँ अपन माता अन्नपूर्णा मिश्रक नाममे जग्गा दर्ता कय बेचबिखन कयल गेल । चौधरी कहलनि जे यदि अदालतद्वारा कायम ५४ फिट सड़क, मुरलीसर पोखरिक सीमा तथा कि.नं. ९३ अन्तर्गत मन्दिरक जग्गाके आधार मानल जाए तँ मन्दिरक आगाँ कोनो निजी जग्गा रहबाक प्रश्ने नहि उठैत अछि ।
ओ आर्थिक चलखेलक आशंका व्यक्त करैत कहलनि जे गुठी शाखा प्रमुखसँ २०८३ साउन ४ गते भेल छलफल आ आइ कार्यालयमे भेटल व्यवहारसँ हुनका एहन अनुभूति भेल।
निवेदनमे गुठी संस्थानसँ मुरलीसर पोखरि, पोखरिक डिल, पनिहाव तथा कि.नं. ९३ अन्तर्गत दुर्गा मन्दिर आ श्रीकृष्ण मन्दिरक भोगक सार्वजनिक गुठी जग्गाक पुनः नापजाँच, सीमाङ्कन तथा अतिक्रमण हटाबि संरक्षणक व्यवस्था करबाक माग कयल गेल अछि।
निवेदक आवश्यक प्रमाणस्वरूप गुठीक पत्र, जग्गाधनी प्रमाणपत्र, अदालतद्वारा भेल नाप–नक्सा तथा फैसला सहितक कागजात सेहो संलग्न कयने छथि।