गुठीका पोखरी तथा डिलमा भएको अतिक्रमण हटाउने काम चरणबद्ध रूपमा अघि बढाइँदै

50 मिनट पहिले प्रकाशित

Smrititimes

जनकपुरधाम
भदौँ २५ गते । गुठीको जग्गा संरक्षण तथा व्यवस्थापनका लागि गठित उच्चस्तरीय कार्यदलको प्रतिवेदन, २०६२ कार्यान्वयन समितिको निर्णयअनुसार गुठीका पोखरी तथा पोखरीका डिलमा भएको अतिक्रमण हटाउने काम चरणबद्ध रूपमा अघि बढाइएको छ। गुठी संस्थानका अनुसार प्रतिवेदन कार्यान्वयन समितिअन्तर्गत रही शाखा कार्यालयबाट आवश्यक सहजीकरण तथा समन्वयको काम भइरहेको छ। समितिले गरेको निर्णयअनुसार पहिलो चरणमा सातवटा पोखरीको अतिक्रमण हटाउने काम सम्पन्न भइसकेको छ।

पहिलो चरणअन्तर्गत पोखरी तथा पोखरीका डिलमा रहेका घर, टहरा तथा अन्य संरचनासहितको अतिक्रमण हटाउनुका साथै पोखरी र डिलको रेखांकनसमेत सम्पन्न गरिएको संस्थानले जनाएको छ।
अतिक्रमण हटाउने विषयमा पछिल्लो समय सार्वजनिक रूपमा समाचार आएपछि केही विरोधसमेत भएको थियो। संस्थानका अनुसार उक्त घटनामा मूलतः समन्वयको अभाव देखिएको हो। समितिबाट पठाइएको सूचना सम्बन्धित पक्षले सही रूपमा नबुझेका कारण समस्या उत्पन्न भएको र यस विषयमा कुनै विवाद नरहेको संस्थानको भनाइ छ।
यसैबीच, आगामी चरणमा अतिक्रमण हटाउने काम कहिले सुरु गर्ने भन्नेबारे भने हालसम्म निर्णय भइसकेको छैन। यसका लागि प्रतिवेदन कार्यान्वयन समितिको बैठक बस्ने र सोही बैठकबाट मिति तय गरिने जनाइएको छ।
संस्थानका अनुसार २०८३ भदौ १९ गते अतिक्रमण हटाउनेसम्बन्धी सूचना प्रकाशित गरिसकिएको छ। सूचना गोरखापत्रमा समेत प्रकाशित गरिएको तथा सम्बन्धित स्थान, पोखरी र पोखरीका डिलमा माइकिङ गर्नुका साथै सूचनासमेत टाँस गरिएको छ।तर, अतिक्रमण हटाउने काम कुन दिनबाट सुरु हुने भन्नेबारे अहिलेसम्म निश्चित जानकारी नभएको संस्थानले जनाएको छ। समितिको बैठकपछि मात्रै त्यसको टुंगो लाग्ने बताइएको छ।