औरही नगरपालिका–८ टिमकियामा विद्युत् विस्तार विवाद, निष्पक्ष छानबिनको माग

45 मिनट पहिले प्रकाशित

Smrititimes

जनकपुरधाम
असोज १ गते । महोत्तरीको औरही नगरपालिका–८ टिमकियामा ट्रान्सफर्मर जडान तथा विद्युत् विस्तारको विषयलाई लिएर भएको विवादमा राष्ट्रिय स्वतन्त्र पार्टी (रास्वपा) औरही नगर समितिले निष्पक्ष छानबिनको माग गरेको छ । रास्वपा औरही नगर समितिले विज्ञप्ति जारी गर्दै विकास निर्माणका विषयमा पहल गर्न नगरपालिका पुगेका स्थानीय युवा तथा किसान र नगर प्रमुखबीच विवाद बढ्दै गएपछि झडप भएको दाबी गरेको छ । समितिले घटनाका क्रममा पालिकाका मेयरले प्रदीपकुमार खड्काले स्थानीयलाई अपमानजनक शब्द प्रयोग गरिएको, झडपको अवस्था सिर्जना गरिएको तथा नगर परिसरमा बोलाइएका बाउन्सरमार्फत कुटपिट भएको आरोपसमेत लगाएको छ ।

समितिले घटनाको वास्तविकता सार्वजनिक गर्न नगरपालिकाभित्र तथा घटनास्थलमा रहेका सीसीटीभी फुटेज, प्रत्यक्षदर्शीको बयान, भिडियो प्रमाण र सबै पक्षका भनाइलाई आधार बनाउनुपर्ने जनाएको छ । साथै, घटनामा प्रहरीको भूमिका, पक्राउ प्रक्रिया र सुरक्षा व्यवस्थाबारे समेत निष्पक्ष छानबिन गर्न माग गरिएको छ । रास्वपा औरही नगर समितिका सभापति संजित यादव र सचिव धिरजकुमार मण्डलद्वारा जारी विज्ञप्तिमा छानबिन अवधिभर नगर प्रमुख प्रदीपकुमार खड्कालाई पदबाट अलग राख्न वा पदमुक्त गर्न माग गरिएको छ । समितिले दोषी जोसुकै भए पनि प्रमाणका आधारमा कारबाही गर्नुपर्ने र निर्दोषलाई राजनीतिक प्रभावका आधारमा दोषी नबनाउन आग्रह गरेको छ ।

यसैबीच, रास्वपाका सांसद दिपककुमार साहले पनि औरही नगरपालिका–८ टिमकियामा ट्रान्सफर्मर जडानको विषयमा भएको घटनाबारे प्रतिनिधिसभामा ध्यानाकर्षण गराएका छन्। बुधबार संसद्मा बोल्दै साहले विकासका विषयमा छलफल गर्न नगर प्रमुखसमक्ष पुगेका युवाहरू र सम्बन्धित पक्षबीच विवाद बढ्दै जाँदा झडप भएको तथा चार जना युवालाई पक्राउ गरी जिल्ला प्रहरी कार्यालय लगिएको बताएका छन्।

सांसद साहले विकासको माग राख्दै स्थानीय सरकारसमक्ष पुग्नु र प्रश्न गर्नु नागरिकको अधिकार भएको उल्लेख गर्दै घटनाको निष्पक्ष र पारदर्शी छानबिन हुनुपर्ने माग गरे। उनका अनुसार विकास निर्माणका विषयलाई राजनीतिक मुद्दा नबनाई जनतालाई सहज हुने गरी अघि बढाउनुपर्छ।

साहले गृह प्रशासन र सम्बन्धित निकायलाई तत्काल पहल गरी शान्ति कायम गर्न तथा घटनाको सत्यतथ्य बाहिर ल्याउन आग्रह गरेका छन्।

हाल घटनामा संलग्न विभिन्न पक्षका आरोप तथा दाबीहरूबारे आधिकारिक अनुसन्धानको पूर्ण निष्कर्ष सार्वजनिक भइसकेको छैन। त्यसैले सीसीटीभी फुटेज, प्रत्यक्षदर्शीका बयान र सम्बन्धित निकायको अनुसन्धानपछि मात्रै घटनाको वास्तविकता स्पष्ट हुने देखिन्छ।