दोस्रो प्रयासबाट जनकपुर एयरपोर्टमा अवतरण भयो मुख्यमन्त्री यादवसहितको विमान

2 वर्ष पहिले प्रकाशित

Smrititimes

जनकपुरधाम, ९ फागुन ।मधेश प्रदेशका मुख्यमन्त्री सरोजकुमार यादवसहित काठमाडौंबाट उडान भरेको बुद्ध एयरको उडान नम्बर यु फोर ५०९ को यात्रुवाहक विमान बुधबार साँझ जनकपुर विमानस्थलमा ओभरसुट गरी पुनः अवतरण गरेको छ ।

जनकपुर विमानस्थलमा एककासि स्याल देखिएपछि ७० यात्रु उडान भरिरहेको विमानका चालकले अवतरण हुनुभन्दा निमेष भरअघि विमानलाई ओभरसुट गराएका थिए । ओभरसुट (विमान अवतरण हुने अन्तिम क्षणमा रनवेमा नआई पुनः उडान भर्ने) हुँदा विमानलाई करिब २० मिनेट सिरहा र धनुषामा फन्को मार्नुपरेको थियो । यस अवस्थालाई होल्ड समेत भनिन्छ ।

जनकपुर विमानस्थलस्थित बुद्धएयरका स्टेशन म्यानेजर विजयकुमार सिँहले धावनमार्गमा कुनै वस्तु देखिएर सामान्य अवरोधको अवस्था तथा हावाको गतिका कारण ओभरसुट हुने गरेको बताए ।

कहिलेकाँही अनस्टेवल एप्रोच र एप्रोच फाइल नमिलेर पनि त्रिभुवन विमानस्थललगायत नेपालका अन्य एयरपोर्टमा विमान ओभरसुट हुनेगरेका छन् ।

विमान चालकले जोखिम मोल्न नचाहेर ओभरसुट गराउने गरेको र यो सामान्य अवस्था सामान्य भएको स्टेशन म्यानेजर सिँहको भनाइ छ ।

विमानमा सवार नेपाल पत्रकार महासंघका पूर्व केन्द्रीय सदस्य शैलेन्द्र झाले गुन्टा कसेर विमानबाट निस्कने मनस्थितिमा रहेका बेला अवतरण नहुँदै विमान एक्कासि उचाइ लिन थालेको र अलिक बेर फन्को मार्दैै अवतरण भएको बताए ।

‘प्रायः हवाईयात्रा गर्नेका लागि यस्तो अनुभव नौलो र फरक नभए पनि कम हवाईयात्रा गरेका यात्रुलाई यो अवस्थाले त्रसित तुल्याउँछ नै । विमानमा केही यात्रुका अनुहार मलिन रहेको पाएँ,’ झाले भने ।

विमान आभरसुट भएको र त्यसको कारण धावनमार्गमा स्याल आएको जानकारी विमान परिचारिकाले विमान उडिरहेकै बेला सुनाई यात्रुलाई सान्तवना दिएका थिए ।

बुद्ध एयरको ओभरसुटका कारण यति एयरको विमानसमेत जनकपुरमा अवतरण हुनुपूर्व होल्डमा परेको थियो ।

साभार : टोलपडोस