रूपान्तरणकारी राजनीतिक नेतृत्व तथा निर्वाचन तयारीसम्बन्धी पाँच दिने तालिम सम्पन्न

2 घन्टा पहिले प्रकाशित

Smrititimes

जनकपुरधाम
असोज ८ गते । महिला राजनीतिक सहभागिता तथा नेतृत्व विकासलाई प्रवद्र्धन गर्ने उद्देश्यले सञ्चालित पाँच दिने ‘रूपान्तरणकारी राजनीतिक नेतृत्व तथा निर्वाचन तयारी’सम्बन्धी आवासीय तालिम सम्पन्न भएको छ ।
ओरेकको आयोजना तथा यूएन ओमेनको सहकार्यमा सञ्चालित रूपान्तरण कार्यक्रम अन्तर्गत तालिम आयोजना गरिएको हो । तालिममा मधेश प्रदेशका धनुषा, सप्तरी, सिरहा, रौतहट, बारा र पर्सा जिल्लाका १५ पालिकाबाट ३८ जना समुदायका अगुवा महिला तथा निर्वाचित महिला जनप्रतिनिधिको सहभागिता रहेको थियो ।
तालिममा रूपान्तरणकारी तथा महिलावादी नेतृत्व, महिला राजनीतिक सहभागिता, निर्वाचन प्रणाली तथा कानुन, निर्वाचन अभियान तथा रणनीति, लैङ्गिक समानता तथा सामाजिक समावेशीकरण, लैङ्गिक उत्तरदायी बजेट, स्थानीय शासन, सार्वजनिक जवाफदेहिता, राजनीतिक सञ्चार, सामाजिक सञ्जालको प्रयोग तथा आगामी निर्वाचनको तयारीलगायतका विषयमा छलफल तथा अन्तरक्रिया गरिएको थियो।

सहभागी महिलाहरूलाई राजनीतिक क्षेत्रमा प्रभावकारी सहभागिता जनाउन आवश्यक नेतृत्व क्षमता, निर्वाचनसम्बन्धी ज्ञान तथा रणनीतिक तयारीका विषयमा प्रशिक्षण दिइएको आयोजकले जनाएको छ। त्यस्तै, स्थानीय तहमा महिलाको अर्थपूर्ण सहभागिता र नेतृत्वलाई थप प्रभावकारी बनाउने उपायबारे पनि छलफल गरिएको थियो। पाँच दिने तालिमको सहजीकरण प्रशिक्षक टेकनाथ सुवेदी र ओरेक मधेश प्रदेश संयोजक विणा सिंहले गर्नुृभएको थियो ।
महिलाको अर्थपूर्ण राजनीतिक सहभागिता, नेतृत्व विकास तथा रूपान्तरणकारी नेतृत्व निर्माणका लागि आगामी दिनमा पनि यस्ता कार्यक्रमलाई निरन्तरता दिइने आयोजकले जनाएको छ ।