दादुरा–रुबेला बिरुद्धको खोप लिन मेयर साहद्वारा आग्रह

1 वर्ष पहिले प्रकाशित

Smrititimes

जनकपुरधाम, फागुन ९ गते ।मधेश प्रदेश सरकार स्वास्थ्य तथा जनसंख्या मन्त्रालयद्वारा दादुरा–रुबेला बिरुद्धको खोप अभियान २०८०–८१ अन्तर्गत धनुषा जिल्लामा दुई चरणमा खोप लगाइने भएको छ ।

जनकपुरधाम उपमहानगरपालिका खोप समन्वय समितिले बुधवार स्थानीय तथा वडा स्तरीय तहमा दादुरा रुबेला खोप सम्बन्धी बैठक तथा अभिमुखीकरण गोष्ठिको आयोजना गरेको हो ।

जनकपुरधाम उपमहानगरपालिकाका मेयर मनोज कुमार साहले ९ महिना देखि १५ वर्ष सम्मका बच्चाहरुलाई दादुरा–रुबेला विरुद्धको खोप लिन आग्रह गरे ।

मेयर साहले दादुरा–रुबेला खोप केन्द्रको व्यवस्था विद्यालयहरुमा भएकाले प्रधानाध्यापकहरुलाई अभियानलाई सफल बनाउन निर्देशन दिए ।

उनले दादुरा–रुबेला महामारी विभिन्न जिल्लाहरुमा फैलिएको हुंदा रोगसंग लड्ने क्षमता प्रदान गर्न तथा सुरक्षित रह्नका लागि खोप लगाउनु आवश्यक रहेको ध्यानाकर्षण गराए ।

उनले जनकपुधाम उपमहानगरपालिका अन्तर्गत ९ वटा वडामा खोपपूर्ण घोषणा तथा १० वटा केन्द्रको स्थापना भएपनि महुवा तथा लोहनामा संक्रमित फेला पर्दा खोप लिन जरुरी रहेको बताए ।

दादुरा–रुबेला खोप अभियानलाई प्रथम चरण र दोस्रो चरण गरि दुई चरणमा बांडेका छन् ।

धनुषाको १८ वटा स्थानीय तहमध्ये पहिलो चरण फाल्गुन १३ गते देखि २१ गते सम्ममा ९ वटा स्थानीय तहमा खोप सेवा उपलब्ध गराइने कार्यक्रम रहेको छ ।

स्थानीय तह अन्तर्गत जनकपुरधाम उपमहानगरपालिका, नगराईन नगरपालिका, मुखियापट्टि मुसहरनिया गाउंपालिका, हंसपुर नगरपालिका, लक्ष्मीनिया गाउंपालिका, क्षिरेश्वर नगरपालिका, बटेश्वर गाउपालिका , मिथिला नगरपालिका, गणेशमान चारनाथ नगरपालिकामा दादुरा रुबेला खोपको सेवा दिईने जिल्ला स्वास्थ्य कार्यालय धनुषाका खोप अधिकृत राजदेब यादबले जनाए ।

अधिकृत यादवले दोस्रो चरणमा धनौजी गाउंपालिका, औरही गाउंपालिका , विदेह नगरपालिका , जनकनन्दनी गाउंपालिका, कमला नगरपालिका , शहिदनगर नगरपालिका , सबैला नगरपालिका , धनुषाधाम नगरपालिका, मिथिला बिहारी नगरपालिकामा खोप लगाइने ब्यवस्था रहेका बताए ।