शान्ति पुनस्र्थापना गृहको वार्षिक लेखा परीक्षण सम्पन्न

4 महीना पहिले प्रकाशित

Smrititimes

जनकपुरधाम
कार्तिक २८ गते । मुख्य रुपमा मानव बेचबिखनको बिरुद्धमा काम गरिरहेका शान्तिपुनस्र्थापना गृह धनुषा शाखाको आर्थिक वर्ष २०८१–८२ मा संचालित कार्यक्रमहरुको वार्षिक सामाजिक लेखा परीक्षण कार्यक्रम शुक्रबार सम्पन्न भएको छ । संस्थाका केन्द्रिय सचिब परशुराम गौतमको अध्यक्षतामा भएको सो कार्यक्रममा बोल्दै प्रमुख अतिथी जिल्ला समन्वय समिति धनुषाका सभापति राजनन्दन मंडलले मानव बेचबिखनका बिरुद्ध यो संस्थाले गरिरहेका कामलाई सराहना गर्दै प्रशासनको समन्वयमा मानव बेचबिखनका विरुद्धमा थप सक्रियता आवश्यक्ता रहेको बताउनु भयो ।

सो कार्यक्रममा बोल्दै धनुषाका प्रमुख जिल्ला अधिकारी प्रेम प्रसाद लुईटेलले साइवर क्राइम तथा सामाजिक संजालको माध्यमबाट बढी महिला तथा बालबालिकाहरुको सिमापार तथा तेस्रो मुलुकमा बेचबिखन भईरहेको अवस्थामा सतर्क रहन समेत आग्रह गर्नु भयो । उहाँले घर परिवार छिमेक हुदै जिल्ला भरी यसका बिरुद्धमा सबैले मानव बेचबिखन विरुद्धमा भुमिका निर्वाह गर्नुपर्ने बताउनु भयो ।

सो कार्यक्रममा बोल्दै नगराईन नगरपालिकाका मेयर विनय यादवले नेपाल भारत सिमा क्षेत्रमा मावन बेचबिखनका जोखिम बढेको बताउनु भयो । पालिका लगायत शान्ति पुनस्र्थापना गृहले सो क्षेत्रमा काम गरिरहेपनि खुल्ला सिमानाका कारण समेत समस्या भईरहेको बताउनु भयो । सो कार्यक्रममा धनुषाका प्रहरी प्रमुख प्रहरी उपरिक्षक रुगम बहादुर कुँवर,जनकपुरधाम उपमहानगरपालिकाका उपप्रमुख किशोरी साह, अधिवक्ता रेखा झा, मावअधिकारकर्मी जमुना भुजेल लगायतकाले मत्तव्य राख्दै मानव बेचबिखनका बिरुद्धमा शान्ति पुनस्र्थापना गृहले गरिरहेका कामको सराहना गर्नु भएको थियो ।

धनुषा जिल्लामा २०७९ फागुन ११ गते देखि शाखा कार्यालय स्थापना गरी मानव बेचबिखन तथा ओसारपोसार विरुद्ध सेवा गर्दै आएको शान्ति पुनस्र्थापना गृहले जनकपुरधाम रेल्वे स्टेशन, जनकपुर बसपार्क तथा जटही सिमा नाकामा सम्पर्क कार्यालय स्थापना गरी मानव बेचबिखन तथा ओसारपोसार विरुद्ध सूचना तथा परामर्श, उद्धार, पारिवारिक पुनर्मिलन लगायतका विभिन्न अभियानहरु संचालन गर्दै आएका छन् । गृहका धनुषा शाखा प्रमुख रिना झाका अनुसार २०८१ साउन १ गते देखि २०८२ असार ३१ गते सम्म जनकपुरधाम रेल्वेस्टेशनबाट २ हजार एक सय ८४ जनालाई परामर्श, एक सय ९० जनालाई उद्धार गरिएको छ ।

त्यस्तै जटही नाकाबाट ९ सय ८४ जनालाई परामर्श, ५१ जनालाई उद्धार, जनकपुर बसपार्कबाट एक सय ६६ जनालाई परामर्श तथा १९ जनालाई उद्धार गरी एक वर्षमा धनुषा शाखाले कुल ३ हजार ३ सय ३४ जनालाई परामर्श तथा २ सय ६० जनालाई उद्धार गरिएको छ ।