बर्दिवासमा कृषक महिला तथा युवा समूहसँग ओरेकको भेटघाट तथा छलफल सम्पन्न

2 महीना पहिले प्रकाशित

Smrititimes

जनकपुरधाम
जेठ ५ गते । ओरेक का कार्यक्रम व्यवस्थापक सुलोचना खनाल तथा मधेश प्रदेश संयोजक विणा सिंह द्वारा बर्दिवास नगरपालिका वडा नं. ९ र १३ का कृषक महिला समूह तथा युवा समूहसँग भेटघाट तथा छलफल कार्यक्रम सम्पन्न गरिएको छ ।

कार्यक्रममा सहभागी महिलाहरूले समूहमा आबद्ध भएपछि आफ्नो जीवनमा सकारात्मक परिवर्तन आएको अनुभव साझा गरेका थिए । उनीहरूले विभेदकारी सामाजिक संरचना तथा हानिकारक मूल्य–मान्यताका कारण पहिले घरबाट बाहिर निस्कन, आफ्ना कुरा खुलेर राख्न तथा आफूमाथि हुने विभेद र हिंसाबारे बोल्न नसक्ने अवस्था रहेको उल्लेख गर्दै अहिले भने यस्ता विषयमा चेतना र बुझाइमा उल्लेखनीय वृद्धि भएको बताएका थिए ।

छलफलका क्रममा सहभागीहरूले बढ्दो रासायनिक विषादीको प्रयोगले महिलाको यौन तथा प्रजनन स्वास्थ्यमा पार्ने असरबारे पहिलेभन्दा बढी जानकारी र सचेतना प्राप्त भएको धारणा पनि व्यक्त गरेका थिए । सहभागीहरूले पालिका र ओरेकको सहकार्यमा सीपमूलक तालिम सञ्चालन गरी व्यवसाय गर्ने अवसर प्राप्त भए आर्थिक रूपमा जीविकोपार्जन सहज भई आत्मनिर्भर बन्न सकिने बताएका थिए । कार्यक्रममा ओरेकले समुदायको आवश्यकतालाई मध्यनजर गर्दै पालिकाको योजना तथा कार्यक्रममा समुदायका सवाल र माग सम्बोधन हुने गरी आवश्यक पैरवी गर्ने प्रतिबद्धता व्यक्त गरेको थियो ।