जनकपुरको शिवचोकमा संचालनमा आयो ‘द चोकोहस क्याफे’

3 महीना पहिले प्रकाशित

Smrititimes

जनकपुरधाम, असार २९ गते ।
जनकपुरधामको शिवचोकमा संयुक्त लगानीमा स्थापना गरिएको आधुनिक तथा स्वास्थ्यमैत्री दर्शक क्याफे हाउस आइतबार देखि सञ्चालनमा आएको छ । करिब ५० लाख रुपैयाँको अनुमानित लागतमा स्थापना गरिएको क्याफेमा दुई जना साझेदारको समान (५०–५० प्रतिशत) लगानी रहेको छ । क्याफेको व्यवस्थापन भारतीय नागरिक अमित कुमार सिंहले सम्हाल्नुभएको छ । क्याफेको उद्घाटन समारोहलाई सम्बोधन गर्दै संचालक रामदेव पुर्वेले क्याफे केवल व्यापारिक उद्देश्यका लागि नभई स्वस्थ खानाको संस्कृतिलाई प्रवद्र्धन गर्दै रोजगारी सिर्जना गर्ने लक्ष्यसहित सञ्चालनमा ल्याइएको बताउनुभयो । उहाँका अनुसार क्याफेमा जनकपुरमै पहिलो पटक उपलब्ध गराइएको दाबी गरिएको १२ प्रकारका हट चकलेट मुख्य आकर्षणका रूपमा रहेको छ । दूधसँग तयार गरिने यी हट चकलेट स्वादिष्ट हुनुका साथै शरीरलाई ऊर्जा प्रदान गर्ने विश्वास गरिएको छ । साथै, विभिन्न प्रकारका कोल्ड चकलेट, मकटेल, जुस, अमेरिकानो कफीसहित विभिन्न स्वादका कफी तथा कोल्ड कफी पनि उपलब्ध छन् । साथै अन्य परिकारहरूमा मेक्सिकन स्ट्रिट फ्राइज, चिज कर्न बल, प्रोटिन तथा भिटामिनयुक्त केक, चिकेन कबाब, मटन कबाब, शामी कबाब लगायतका विभिन्न परिकार समावेश गरिएको छ। बजारमा प्रचलित जंक फुडको विकल्पका रूपमा पोषणयुक्त, गुणस्तरीय र स्वास्थ्यअनुकूल परिकारलाई प्राथमिकता दिइएको सञ्चालकले दावी गरे । क्याफेमा आधुनिक मेसिनमार्फत सेवा प्रदान गरिने व्यवस्था गरिएको छ । दक्ष कुक, वेटर तथा अन्य जनशक्तिको व्यवस्थापन गरी ग्राहकलाई स्वच्छ, सुरक्षित र गुणस्तरीय सेवा उपलब्ध गराइने प्रतिबद्धता पनि व्यक्त गरिएको छ ।