खाद्य स्वच्छता र एएमआर नियन्त्रणका लागि जनकपुरधाममा बहु–क्षेत्रीय सहकार्यमा जोड

2 महीना पहिले प्रकाशित

Smrititimes

जनकपुरधाम,
असार ३० गते।
खाद्य स्वच्छता प्रवद्र्धन, सुरक्षित खाद्य प्रणालीको विकास तथा खाद्यजन्य प्रतिजैविक प्रतिरोध (एएमआर) नियन्त्रण गर्ने उद्देश्यले जनकपुरधाममा एकदिने सचेतना कार्यक्रम सम्पन्न भएको छ । खाद्य प्रविधि तथा गुण नियन्त्रण कार्यालय, धनुषाको आयोजनामा संयुक्त राष्ट्रसंघीय खाद्य तथा कृषि संगठन (एफएओ) नेपालको सहयोगमा सम्पन्न कार्यक्रममा वक्ताहरूले खाद्य स्वच्छता र सुरक्षित खाद्य प्रणाली सुनिश्चित गर्नुका साथै प्रतिजैविक (एन्टिबायोटिक) औषधिको अनावश्यक प्रयोग रोक्नुपर्नेमा जोड दिएका थिए । सहभागीहरूका अनुसार मानव, पशु र वातावरणीय स्वास्थ्य एकअर्कासँग प्रत्यक्ष रूपमा जोडिएको भएकाले वन हेल्थ अवधारणा अनुसार समन्वित प्रयासबाट मात्र प्रतिजैविक प्रतिरोध नियन्त्रण गर्न सकिन्छ ।
एफएओ नेपालका डा. साकार शिवाकोटीले परियोजनाको प्रगति प्रस्तुत गर्दै राष्ट्रिय तथा मधेश प्रदेशमा एएमआरको अवस्था, चुनौती र आगामी योजनाबारे जानकारी गराउनुभयो । उहाँका अनुसार सुरक्षित खाद्य उत्पादन, प्रतिजैविक औषधिको विवेकपूर्ण प्रयोग तथा वैज्ञानिक निगरानी प्रणालीलाई सुदृढ बनाउन सके प्रतिजैविक प्रतिरोध नियन्त्रणमा सकारात्मक उपलब्धि हासिल गर्न सकिन्छ ।
कार्यक्रमका प्रमुख अतिथि मधेश प्रदेश सरकार, भूमि व्यवस्था, कृषि तथा सहकारी मन्त्रालयका सचिव डा. सञ्जय कुमार यादवले प्रतिजैविक औषधि आवश्यक परेको अवस्थामा मात्र जिम्मेवारीपूर्वक प्रयोग गर्न आग्रह गर्नुभयो। उहाँले एएमआर विश्वव्यापी जनस्वास्थ्यको गम्भीर चुनौती बनिसकेको उल्लेख गर्दै यसको नियन्त्रणका लागि प्रदेश सरकार आवश्यक सहयोग र समन्वय गर्न प्रतिबद्ध रहेको बताउनुभयो।

धनुषाका प्रमुख जिल्ला अधिकारी प्रेम प्रसाद लुईँटेलले खाद्य सुरक्षा सुनिश्चित गर्न नियामक निकाय, स्थानीय तह, निजी क्षेत्र, उत्पादक तथा उपभोक्ताबीच समन्वित प्रयास अपरिहार्य रहेको बताउँदै खाद्य स्वच्छतासम्बन्धी जनचेतना बढाउनुपर्नेमा जोड दिनुभयो।
कार्यक्रमको मुख्य आकर्षणका रूपमा रहेको प्यानल छलफलमा खाद्य, स्वास्थ्य, पशु सेवा, उपभोक्ता अधिकार तथा युवा क्षेत्रका प्रतिनिधिहरूले खाद्य स्वच्छता ऐन, २०८१ को कार्यान्वयन, प्रतिजैविक औषधिको जिम्मेवार प्रयोग, एकीकृत निगरानी प्रणाली, निजी क्षेत्रको भूमिका, उपभोक्ताको अधिकार तथा वन हेल्थ अवधारणाको प्रभावकारी कार्यान्वयनका विषयमा आफ्ना धारणा राख्नुभयो। छलफलमा एएमआर स्वास्थ्य क्षेत्रको मात्र समस्या नभई सम्पूर्ण समाजको साझा चुनौती भएको निष्कर्ष निकालिएको थियो । कार्यक्रममा सहभागीहरूले आगामी दिनमा सुरक्षित खाद्य उत्पादन, प्रतिजैविक औषधिको विवेकपूर्ण प्रयोग तथा खाद्य स्वच्छतासम्बन्धी जनचेतना आफ्ना–आफ्ना क्षेत्र र समुदायसम्म विस्तार गर्ने प्रतिबद्धता व्यक्त गरेका थिए ।
कार्यक्रमको समापनमा खाद्य प्रविधि तथा गुण नियन्त्रण कार्यालय, मधेश प्रदेशका प्रमुख बिमल दाहालले खाद्य स्वच्छता, खाद्य सुरक्षा तथा प्रतिजैविक प्रतिरोध नियन्त्रण सरकार, निजी क्षेत्र, उत्पादक, उपभोक्ता तथा सम्पूर्ण सरोकारवालाको साझा जिम्मेवारी भएको उल्लेख गर्नुभयो। उहाँले बहु–क्षेत्रीय सहकार्य, वैज्ञानिक निगरानी तथा प्रमाणमा आधारित नीतिको प्रभावकारी कार्यान्वयनमार्फत सुरक्षित खाद्य प्रणाली निर्माणमा जोड दिँदै यस्ता कार्यक्रमले मधेश प्रदेशमा उपभोक्ता स्वास्थ्य संरक्षण तथा खाद्यजन्य प्रतिजैविक प्रतिरोध नियन्त्रणमा दीर्घकालीन सकारात्मक प्रभाव पार्ने विश्वास व्यक्त गर्नुभयो। कार्यक्रममा सरकारी निकाय, स्वास्थ्य तथा पशु सेवा क्षेत्र, स्थानीय तह, निजी क्षेत्र, खाद्य उत्पादक, उपभोक्ता अधिकारकर्मी तथा सञ्चारकर्मीहरूको उल्लेखनीय सहभागिता रहेको थियो।