विरोधक बाद मधेश सरकार आम संचार विधेयकक प्रक्रिया तत्काल स्थगित कएलक

2 महीना पहिले प्रकाशित

Smrititimes

जनकपुरधाम, साउन १२।
संचार क्षेत्रसँ उठल तीव्र विरोध आ सरोकारवाला पक्षक दबाबक बाद मधेश प्रदेश सरकार अध्यादेशमार्फत आनल जाए रहल मधेश प्रदेश आम संचार विधेयक, २०८२ क प्रक्रिया तत्काल लेल स्थगित कए देलक अछि।

स्वायत्त संचार संस्थासभकेँ गाभए संबंधी प्रावधान राखल गेल एहि प्रस्तावित विधेयककेँ पर्याप्त छलफल आ परामर्श बिना आगाँ बढ़ाओल गेल अछि, एहि आरोपक संग पत्रकार आ संचार क्षेत्रसँ जुड़ल विभिन्न संघ–संस्थासभ विरोध जनौने छल।

एहि क्रममे नेपाल पत्रकार महासंघ, मधेश प्रदेश समितिक प्रतिनिधिमण्डल गृह, संचार तथा कानूनमन्त्री फकिरा महतो आ मधेश प्रदेशक प्रमुख सचिव शोभाकान्त पोडेलकेँ ज्ञापनपत्र बुझबैत विधेयकक प्रक्रिया तत्काल रोकबाक माँग केने छल। ज्ञापनपत्र ग्रहण करैत मन्त्री महतो कहलनि जे किछु पक्ष सरकारकेँ गलत ढंगसँ जानकारी देने छल, तेँ प्रस्तावित विधेयक तत्काल आगाँ नहि बढ़ाओल जाएत आ एकर प्रक्रिया रोकि देल गेल अछि।

पत्रकार महासंघसहित विभिन्न सरोकारवाला पक्षक कहब छल जे संचार क्षेत्रसँ पर्याप्त संवाद आ सहमति बिना कानून बनेबाक प्रयास भेल अछि, जाहिसँ प्रेस स्वतन्त्रता आ स्वायत्त संचार संस्थाक अस्तित्व पर प्रतिकूल प्रभाव पडÞि सकैत अछि। एहि कारणसँ सभ पक्ष विधेयकक पुनः समीक्षा करबाक माँग कए रहल छल।

संचार क्षेत्रसँ लगातार उठल विरोध आ पत्रकार महासंघक दबाबक बाद प्रदेश सरकार तत्काल लेल अपन निर्णयसँ पाछाँ हटैत देखाइ पड़ल अछि। आब अपेक्षा कएल जा रहल अछि जे सरोकारवाला सभसँ विस्तृत छलफल आ परामर्शक बादे एहि विधेयकक आगामी प्रक्रिया आगाँ बढ़ाओल जाएत।