सहरसामे पैसेंजर ट्रेनक इंजनमे लागल आगि, मानवीय क्षति नहि

1 घन्टा पहिले प्रकाशित

Smrititimes

जनकपुरधाम
सहरसा साउन १८ गते ।
बिहारक सहरसा जिलान्तर्गत सिमरी बख्तियारपुर रेलवे स्टेशन पर सोमबार भोर समस्तीपुर–सहरसा पैसेंजर ट्रेन (संख्या ६३३४४) केर इंजन आ ओकरासँ जुड़ल एकटा डब्बामे आगि लागि गेल। घटनामे कोनो यात्रीक हताहति अथवा मानवीय क्षतिक सूचना नहि अछि।

प्राप्त जानकारीअनुसार, भोर लगभग ३ः४० बजे ट्रेन स्टेशन पर ठाढ़ रहबाक क्रममे अचानक इंजनसँ आगिक लपटल उठए लागल। सूचना पाबिते सहरसा अग्निशमन कार्यालयक टोली फोम टेन्डर आ पानी टेन्डरसहित घटनास्थल पर पहुँचि आगिपर नियंत्रण पाबि लेलक।

सहरसा अग्निशमन कार्यालयक सहायक अग्नि अधिकृत निरञ्जन कुमार कहलनि जे सूचना प्राप्त होइतहि उद्धार आ आगि नियन्त्रणक कार्य तत्काल आरम्भ कएल गेल। हुनकर अनुसार, समय पर कएल गेल कारबाहीसँ आगि पूर्ण रूपेँ नियन्त्रणमे आबि गेल आ एखन धरि कोनो मानवीय क्षतिक पुष्टि नहि भेल अछि।

घटनाक बाद रेलमे सवार यात्रीसभकेँ सुरक्षित रूपसँ बाहर निकालल गेल। अचानक भेल एहि घटनासँ किछु समय धरि अफरातफरीक स्थिति उत्पन्न भऽ गेल तथा यात्रीसभकेँ असुविधाक सामना करए पड़ल। आगिक कारण रेल सेवापर सेहो अस्थायी प्रभाव पड़ल अछि।

प्रत्यक्षदर्शी यात्रीसभक अनुसार, आगि लगिते रेलमे भगदड़ जकाँ स्थिति बनि गेल, मुदा रेलकर्मी आ उद्धार टोलीक सक्रियतासँ सभ यात्रीकेँ सुरक्षित स्थानपर पहुँचाओल गेल।

आगि लगबाक कारण एखन धरि स्पष्ट नहि भऽ सकल अछि। रेलवे प्रशासन घटनाक कारणक पता लगाबए लेल जाँच शुरू कएने अछि।