नेपाल–भारत सीमामा २.१ किलो गाँजासहित नेपाली नागरिक पक्राउ, एक फरार

1 महीना पहिले प्रकाशित

Smrititimes

जनकपुरधाम, असार २७ — नेपालबाट भारततर्फ गाँजा तस्करी भइरहेको सूचनाका आधारमा भारतको बिहार राज्यस्थित सहरघाट थाना क्षेत्रको तराहा मोडमा गरिएको संयुक्त सुरक्षा कारबाहीमा एक नेपाली नागरिक पक्राउ परेका छन्। घटनामा उनका एक साथी भने फरार भएका छन्।
भारतीय प्रहरीका अनुसार पक्राउ पर्ने व्यक्ति महोत्तरीको लोहारपट्टी नगरपालिका निवासी शहजाद हुन्। उनको साथबाट करिब २.१ किलोग्राम गाँजा बरामद गरिएको प्रहरीले जनाएको छ।
एसएसबीको ४८औँ बटालियन, डी कम्पनी गंगौर र बिहार प्रहरीको संयुक्त टोलीले प्राप्त गोप्य सूचनाका आधारमा तराहा मोड क्षेत्रमा सवारी साधन जाँच अभियान सञ्चालन गरेको थियो। सो क्रममा मधपुरतर्फबाट आइरहेको मोटरसाइकलमा सवार दुई जनाले सुरक्षा टोलीलाई देखेपछि भाग्ने प्रयास गरेका थिए।
प्रहरीले पछ्याउने क्रममा मोटरसाइकलको पछाडि बसेका शहजाद लडेर पक्राउ परेका थिए। चालक भने मोटरसाइकलसहित घटनास्थलबाट फरार भएको भारतीय प्रहरीले जनाएको छ।
पक्राउ परेका शहजादसँग रहेको कालो झोलाको तलासी गर्दा २.१ किलोग्राम गाँजा फेला परेको थियो। घटनापछि लागूऔषध बरामद गरी पक्राउ परेका व्यक्तिमाथि आवश्यक कानुनी प्रक्रिया अघि बढाइएको प्रहरीले जनाएको छ।
संयुक्त अभियानमा एसएसबी र बिहार प्रहरीका अधिकारी तथा सुरक्षाकर्मीको सहभागिता रहेको थियो। फरार रहेका आरोपितको खोजी कार्य जारी रहेको भारतीय प्रहरीको भनाइ छ।