वडा सदस्य चौधरीको समन्वयमा शहिद दुर्गा नन्द झालाई श्रद्धाञ्जली दिइयो

11 महीना पहिले प्रकाशित

Smrititimes

जनकपुरधाम
१५ गते माघ ।
तत्कालिन राजा महेन्द्र माथि जनकपुरधामको जानकी मन्दिरमा बम प्रहार गरेका शहिद दुर्गानन्द झाको सहादत भएको दिन माघ १५ गते उहाँकै गाउँ धनुषाको जटहीमा मंगलबार उहाँलाई श्रद्धाञ्जल िअर्पण गरिएको छ । नगराईन नगरपालिका २ का वडा सदस्य जटही निवासी प्रदिप चौधरीको अगुवाईमा प्रत्येक वर्ष माघ १५ गते हुदै आएको श्रद्धाञ्जली कार्यक्रम मंगलबार सो पालिकाको विभिन्न स्थानमा शहिदको तस्विरमा माल्यार्पण गर्दै मनाइएको छ ।

सो वडामा रहेका दुईटा आधारभूत विद्यालय तथा स्वास्थ्य चौकीमा स्थानीयवासी, शिक्षक, प्रधानाध्यापक, वडाबासीहरुको उपस्थितीमा अमर शहिद दुर्गानन्द झाको ६१ औँ पुण्य तिथीको अवसरमा उहाँको फोटोमा माल्यार्पण गरी श्रद्धासुमन अर्पण गरिएको छ । तत्कालीन राजा महेन्द्रले प्रजातन्त्रलाई समाप्त गर्ने प्रयास गरेपछि ९ माघ २०१८ मा झाले जनकपुरको जानकी मन्दिरमा राजामाथि बम आक्रमणको योजना बनाए । त्यस घटनापछि पक्राउ परेका झालाई २०२० साल माघ १५ गते काठमाडौंको केन्द्रीय कारागारमा मृत्युदण्ड दिइएको थियो । दुर्गानन्द झाको जीवन संघर्ष र साहसको प्रतीक थियो ।

बाल्यकालमा पिताको निधन र नवविवाहित जीवनका अनेक पीडाहरूको बाबजुद उनी देशको भविष्यका लागि लड्न तयार भए । उनका राजनीतिक कदमहरूले नेपालमा प्रजातन्त्रप्रतिको संघर्षलाई अझ तीव्र बनाएको थियो । भारतीय स्वतन्त्रता संग्रामका क्रान्तिकारीहरू भगत सिंह र चन्द्रशेखर आजादबाट प्रेरित झा तत्कालीन निरंकुश पञ्चायती शासनको विरोधमा अग्रसर भएका थिए ।

जनकपुरमा राजा महेन्द्रमाथि बम प्रहार गर्ने योजनामा मुख्य भूमिका निर्वाह गरेका झाको योजना असफल भए तापनि सुरक्षाकर्मीहरूबाट फरार रहे । यस घटनापछि उनले आफूले गरेको कार्यको जिम्मेवारी लिन र निर्दोषलाई यातना पाउन नदिन आत्मसमर्पण गरे । त्यसपछि उनीमाथि राजद्रोहको अभियोग लाग्यो र मृत्युदण्डको सजाय सुनाइयो ।दुर्गानन्द झालाई मृत्युदण्डको सजाय सुनाइएपछि उनकी आमा र पत्नीलाई अन्तिम भेटका लागि बोलाइएको थियो । उनले आमालाई सान्त्वना दिंदै भने, ‘आमा, तपाईंलाई कुनै दिन दुर्गानन्द झाको आमा भनेर सबैले गर्व गर्नेछन् ।’

श्रीमतीलाई पनि आमाको हेरचाह गर्न आग्रह गरेका थिए ।१५ माघ २०२० मा उनलाई फाँसी दिइयो । फाँसीको क्षणसम्म पनि उनी निर्भीक र अडिग देखिएका थिए । उनीमाथि पञ्चायती सरकारले चलाएको मुद्दामा सफाइको अवसर नदिएर विशेष अदालतले मृत्युदण्डको निर्णय सुनायो, जुन नेपालमा ब्राह्मण समुदायमाथि लगाइएको पहिलो मृत्युदण्ड थियो ।