श्रीराम मावि मटिहानीमा वक्तृत्वकला प्रतियोगिता सम्पन्न रागनी साह भईन प्रथम

14 दिन पहिले प्रकाशित

Smrititimes

जनकपुरधाम
मंसिर ८ गते ।
महोत्तरीको मटिहानी स्थित श्रीराम माविमा सोमबार भएको वक्तृत्वकला प्रतियोगितामा सो विद्यालयमा अध्ययनरत कक्षा ९ कि छात्रा रागनी साह प्रथम भएकी छिन् । सो विद्यालयका प्रधानाध्यापक श्रीश कुमार मिश्रको अध्यक्षतामा भएको वर्तमान अवस्थामा लागु पदार्थका कारण समाजमा हुने विभिन्न घटनाहरुको सम्बनधमा शान्तिका लागि युवाको भुमिका विषयक वक्तृत्वकला प्रतियोगिता सम्पन्न भएको छ ।

सो प्रतियोगितामा सहभागी भएका कक्षा ८,९ ,१० र ११ का एक दर्जन सहभागी विद्यार्थीहरु बिच भएको सो वक्तृत्वकलामा कक्षा ९ मा अध्ययनरत छाटा रागनी साह प्रथम, कक्षा ११ मा अध्ययनरत छात्र सशांक राउत द्वितिय, कक्षा १० मा अध्ययनरत छात्र देवराज साह तृतिय तथा जीवन यादव सान्त्वना पुरस्कार प्राप्त गरेका छन् । विजेता चारै जना विद्यार्थीहरुलाई सिल्ड कप वितरण गरिएको थियो ।

सपोर्ट नेपालको आयोजना तथा कुर्वे उस्ट्रोको सहयोगमा संचालित शसक्तिकरण परियोजना अन्तरगत सो विद्यालयमा भएको उक्त प्रतियोगितामा विजेताहरुलाई प्रधानाध्यापक मिश्र,निर्णायक मंडलका सदस्यहरु तथा विद्यालयका शिक्षकहरुले सिल्ड प्रदान गर्नु भएको थियो । सो प्रतियोगितामा राजकीय संस्कृत मावि मटिहानीका प्रधानाध्यापक इश्वरी पौडेल, राम माविका शिक्षक लक्षमण अधिकारी तथा जीवछ कामत निर्णायक मंडलका रुपमा सक्रियताका साथ सहभागीहरुको मुल्याङकन गर्नु भएको थियो ।

सो कार्यक्रमको अध्यक्षता गर्नु भएका प्रधानाध्यापक मिश्रले सहभागी विद्यार्थीहरुले गरेको प्रयासको सराहनीय गर्नु भयो । उक्त प्रतियोगितालाई निर्माणात्मक रुपमा लिई आफु भित्र रहेको कमिकमजोरीलाई हटाउन आग्रह गर्नु भयो ।

उहाँले शिर्षकलाई ध्यानमा राखि मौलिक तरिकाले प्रस्तुत गर्न आग्रह गर्नु भयो । अर्का वक्ता निर्णायक मंडलका प्रतिनिधि राजकीय संस्कृत मावि मटिहानीका प्रधानाध्यापक इश्वरी पौडेलले सहभागी विद्यार्थीहरुले गरेका प्रस्तुतीमा सुधारिनुपर्ने पक्षका सम्बनधमा जानकारी गराउनु भयो ।

उहाँले सपोर्ट नेपालको सहयोगमा विद्यार्थीहरुलाई वक्तृत्वकलाको माध्यमले बोल्ने क्षमताको विकासमा सहयोग पुगेको बताउदै यसलाई विद्यालयले निरन्तरता दिनुपर्ने बताउनु भयो । कार्यक्रममा विद्यालयका शिक्षक तथा विद्यार्थी गरी सय भन्दा बढीको सहभागिता रहेको थियो । सो कार्यक्रममा सपोर्ट नेपालका धनुषाका कार्यक्रम संयोजक सत्रुघन महतोले वर्तमान अवस्थामा युवाहरुमा लागु पदार्थको प्रयोगले समाजमा अशान्ति भईरहेको बेला विद्यार्थीहरुलाई लागु पदार्थको नाकारात्मक पक्षलाई ध्यानमा राखि यो सेवन गर्दा हुने समस्याका विषयमा वक्तृत्वकला प्रतियोगिताको आयोजना गरेको बताउनु भयो ।

सो कार्यक्रममा श्री राम मावि मटिहानीका शिक्षकहरुको पनि सहभागिता रहेको थियो । उक्त कार्यक्रमको सहजिकरण सशक्तिकरण परियोजनाका महोत्तरीका कार्यक्रम संयोजक प्रकाश ठाकुरले गर्नुभएको थियो । कार्यक्रममा ३३५ जनाको सहभागिता रहेको थियो ।