संस्थागत विद्यालयलाई विवरण बुझाउन जनकपुरधाम उपमहानगरपालिकाको निर्देशन

2 महीना पहिले प्रकाशित

Smrititimes

जनकपुरधाम
बैसाख ४ गते
जनकपुरधाम उपमहानगरपालिकाले आफ्नो क्षेत्रभित्र सञ्चालनमा रहेका सबै संस्थागत विद्यालयलाई आवश्यक शैक्षिक र प्रशासनिक विवरण समयमै पेश गर्न आग्रह गरेको छ।

शिक्षा, युवा तथा खेलकुद विकास शाखाद्वारा जारी सूचनामा नगर शिक्षा समितिको चैत ३० गते बसेको बैठकको निर्णयअनुसार यस्तो निर्देशन दिइएको उल्लेख छ। सूचनाअनुसार विद्यालयहरूले ७ दिनभित्र सम्बन्धित कागजातसहित विवरण बुझाउनुपर्नेछ।

उपमहानगरपालिकाले विशेषगरी विद्यालयको वर्गीकरण, शुल्क संरचना र आगामी शैक्षिक सत्र २०८३ का लागि लागू हुने सम्पूर्ण शुल्क विवरण अनिवार्य रूपमा पेश गर्न भनेको छ। साथै, विद्यालय वर्गीकरण गर्दा प्रचलित मापदण्ड र कार्यविधिअनुसार आफ्नो श्रेणी स्पष्ट रूपमा उल्लेख गर्नुपर्नेछ।

यसका अतिरिक्त, कक्षा १ देखि १२ सम्म प्रयोग हुने पाठ्यपुस्तक, पाठ्यसामग्री तथा सिकाइ सामग्रीको विस्तृत विवरण पनि प्रकाशकको नाम र ठेगानासहित बुझाउनुपर्ने व्यवस्था गरिएको छ।
उपमहानगरपालिकाले तोकिएको समयसीमाभित्र विवरण नबुझाउने विद्यालयमाथि आवश्यक कानुनी कारबाही गरिने चेतावनी दिएको छ।

शाखा प्रमुख अन्जु पाण्डेयले हस्ताक्षर गरेको सूचनामा विद्यालयहरूको शुल्क प्रणाली र शैक्षिक सामग्रीमा पारदर्शिता कायम गर्न यस्तो कदम चालिएको जनाइएको छ।