मटिहानीमा घरदैलो तथा विद्यार्थी भर्ना अभियान संचालन

2 महीना पहिले प्रकाशित

Smrititimes

जनकपुरधाम
बैसाख १६ गते । महोत्तरीको मटिहानी नगरपालिकामा घरदैलो तथा विद्यार्थी भर्ना अभियान २०८३ सञ्चालन गरिएको छ। नयाँ शैक्षिक सत्र सुरु भएसँगै विद्यालय बाहिर रहेका तथा नियमित विद्यालय नगइरहेका बालबालिकालाई लक्षित गर्दै यो अभियान अघि बढाइएको हो। नयाँ शैक्षिक सत्रका लागि बैसाख १५ गते देखि २० गते सम्म विद्यार्थी भर्ना अभियान संचालन भएको बेला मटिहानीमा घरदैलो कार्यक्रम सम्पन्न गरिएको छ ।

शैक्षिक सत्र २०८३ का लागि मटिहानी स्थित श्रीराम माध्यमिक विद्यालयका तर्फबाट मटिहानी नगरपालिका वडा नं. ७ र ८ का विभिन्न टोलमा घरदैलो कार्यक्रम सम्पन्न भएको सहयोगी संस्था सपोर्ट नेपालका सशक्तिकरण परियोजनाका महोत्तरीका कार्यक्रम संयोजक प्रकाश ठाकुरले जानकारी दिनुभयो । सपोर्ट नेपालको आयोजना तथा कुर्वे उस्त्रोेको सहयोगमा संचालित सशक्तिकरण परियोजना अन्तरगत मटिहानी स्थित सो विद्यालयमा विद्यार्थी भर्ना अभियानमा सहजीकरण गरिएको छ ।

सो विद्यालयका प्रधानाध्यापक श्रीश कुमार मिश्रको अध्यक्षतामा भएका उक्त घरदैलो कार्यक्रममा मटिहानी नगरपालिकाका प्रमुख हरि प्रसाद मण्डलको विशेष सहभागितामा विद्यालयका दुई सय ५५ जना विद्यार्थी , विद्यालयका शिक्षक, अभिभावक गरी २ सय ७० को उपस्थिती रहेको थियो । घरदैलो कार्यक्रममा सहभागीहरुले विद्यार्थी भर्ना अभियान संग संम्बन्धित प्लेकार्ड सहित टोलबस्तीहरुको पुगेको कार्यक्रमका सहजीकरण गरिरहेको परियोजनाका धनुषाका कार्यक्रम संयोजक शत्रुघन महतोले जानकारी दिनुभयो ।

अभियानका क्रममा टोलीले अभिभावकसँग छलफल गर्दै बालबालिकालाई शिक्षा दिलाउनुको महत्वबारे जानकारी गराइ एको थियो। आर्थिक अवस्था कमजोर भएका तथा विभिन्न कारणले विद्यालय छोडेका बालबालिकालाई पुनः विद्यालय फर्काउन घरदैलो कार्यक्रममा जोड दिइएको छ । सो कार्यक्रममा मटिहानी नगरपालिका शिक्षा शाखाका पदाधिकारी,नगर प्रहरी, सपोर्ट नेपालका सदस्य गंगा प्रसाद साह, सुरक्षा निकायका प्रतिनिधिहरु, स्थानीयबासीको सहभागिता रहेको थियो ।