महोत्तरीका दुई नगरपालिकामा पोषण सुधार अभियान सुरु

5 महीना पहिले प्रकाशित

Smrititimes

जनकपुरधाम

वैशाख २८ गते

महोत्तरी जिल्लाको रामगोपालपुर र औरही नगरपालिकामा समुदायको पोषण अवस्था सुधार गर्ने उद्देश्यसहित नयाँ पोषण कार्यक्रम औपचारिक रूपमा सुरु गरिएको छ। दलित समाज उत्थान समिति नेपालको पहलमा सञ्चालन गरिएको उक्त कार्यक्रमलाई CARE Nepal र iDE ले प्राविधिक तथा आर्थिक सहयोग प्रदान गरेका छन्।

कार्यक्रमको शुभारम्भका अवसरमा आयोजित एकदिने कार्यशाला गोष्ठीमा दुवै नगरपालिकाका शाखा प्रमुख, स्थानीय प्रतिनिधि तथा विभिन्न सरोकारवाला निकायका प्रतिनिधिहरू सहभागी भएका थिए। कार्यक्रममा पोषणसम्बन्धी चुनौती, कार्यक्रमको आवश्यकता र यसले समुदायमा पार्ने सकारात्मक प्रभावबारे कार्यक्रम सल्लाहकार पुनित चौधरीले प्रस्तुतीकरण गर्नुभएको थियो।

गोष्ठीको सुरुआतमा रामभजन महतोले सहभागीहरूलाई स्वागत गर्दै स्थानीय तहमा पोषण सुधारका लागि सामूहिक सहकार्य आवश्यक रहेको बताउनुभयो। कार्यक्रम संयोजकले यस अभियानमार्फत विशेषगरी लक्षित समुदायका बालबालिका, महिला तथा विपन्न परिवारको पोषण अवस्थामा सुधार ल्याउने लक्ष्य राखिएको जानकारी दिनुभयो।

संस्थापक अध्यक्ष सुनिल ठाकुरको अध्यक्षतामा सम्पन्न कार्यक्रममा राम दुलार शाह प्रमुख अतिथिका रूपमा उपस्थित हुनुहुन्थ्यो भने रेनु झासहित सरकारी तथा गैरसरकारी क्षेत्रका विभिन्न प्रतिनिधिहरूको उल्लेख्य सहभागिता रहेको थियो। आयोजक संस्थाले आगामी दिनमा समुदायस्तरमा सचेतना तथा व्यवहार परिवर्तनसम्बन्धी गतिविधि पनि सञ्चालन गरिने जनाएको छ।