जनकपुरधाममा मापदण्ड नपुगेका ७ विद्यालयमाथि कारबाही, अभिभावकलाई सतर्क रहन आग्रह

1 घन्टा पहिले प्रकाशित

Smrititimes

जनकपुरधाम, असार ३ — जनकपुरधाम उपमहानगरपालिकाले आवश्यक कानुनी प्रक्रिया र शैक्षिक मापदण्ड पूरा नगरी सञ्चालनमा रहेका सात वटा निजी विद्यालयलाई अवैध घोषणा गरेको छ। उपमहानगरपालिकाको शिक्षा समितिले गरेको अनुगमनका क्रममा ती विद्यालयहरू दर्ता, स्वीकृति, भौतिक पूर्वाधार तथा सञ्चालनसम्बन्धी आवश्यक मापदण्ड पूरा नगरेको पाइएको जनाएको छ।

शिक्षा समितिको निर्णयअनुसार वडा नं. १३ मा सञ्चालित न्यु पिनाकल एकेडमी र जेम्स एकेडमी स्कुल, वडा नं. ८ का नेशनल चिल्ड्रेन पार्क तथा लिटिल च्याम्प एजुकेशन, वडा नं. २१ स्थित लक्ष्मी–सरस्वती–पार्वती इङ्ग्लिस बोर्डिङ स्कुल, स्टुडेन्ट एकेडमी लादोबेला र वडा नं. ४ स्थित सिद्धार्थ मोन्टेश्वरी स्कुल लाई अवैध विद्यालयको सूचीमा राखिएको छ।

उपमहानगरपालिकाले यस्ता विद्यालयमा अध्ययनरत विद्यार्थीहरूको शैक्षिक भविष्य प्रभावित हुन सक्ने भन्दै अभिभावकलाई विद्यालय छनोट गर्दा त्यसको कानुनी मान्यता, दर्ता स्थिति र सञ्चालन अनुमति सम्बन्धी विवरण अनिवार्य रूपमा बुझ्न आग्रह गरेको छ।

नगरपालिकाका अनुसार शिक्षा क्षेत्रमा गुणस्तर, पारदर्शिता र उत्तरदायित्व कायम गर्न विद्यालयहरूको नियमित अनुगमनलाई थप प्रभावकारी बनाइनेछ। कानुनी प्रक्रिया पूरा नगरी सञ्चालन हुने शैक्षिक संस्थामाथि आवश्यक कारबाही गरिने चेतावनी समेत दिइएको छ।

यस क्रममा जनकपुरधाम उपमहानगरपालिकाका प्रमुख मनोज कुमार साह को नेतृत्वमा शिक्षा समिति, सम्बन्धित सरोकारवाला निकाय तथा एनप्याब्सन जनकपुरधाम का अध्यक्ष दीपक ठाकुर को सहभागितामा विद्यालय अनुगमन अभियान सञ्चालन भइरहेको छ।

शिक्षा समितिले अभिभावक, शिक्षक तथा विद्यालय सञ्चालकलाई प्रचलित कानुन र शैक्षिक मापदण्डको पालना गर्न आग्रह गर्दै गुणस्तरीय शिक्षाको सुनिश्चितताका लागि नगरपालिकाको अभियानलाई सहयोग गर्न अनुरोध गरेको छ।