कमला नगरपालिकामा गर्भवती महिलाका लागि गाउँमै अल्ट्रासाउण्ड सेवा

2 महीना पहिले प्रकाशित

Smrititimes

जनकपुरधाम
असार १० गते ।
कमला नगरपालिकाले गर्भवती महिलाको स्वास्थ्य सेवामा पहुँच सहज बनाउने उद्देश्यले ग्रामीण अल्ट्रासाउण्ड (यूएसजी) सेवा सञ्चालनमा ल्याएको छ । अब नगरभित्रका गर्भवती महिलाले नियमित गर्भ परीक्षणसँगै अल्ट्रासाउण्ड सेवा पनि आफ्नै स्थानीय तहमा प्राप्त गर्न सक्ने भएका छन् । नगर प्रमुख विशेश्वर यादवले सेवाको उद्घाटन गर्दै ग्रामीण क्षेत्रमा बसोबास गर्ने महिलालाई आधारभूत तथा आवश्यक स्वास्थ्य सेवा नजिकबाट उपलब्ध गराउनु स्थानीय सरकारको दायित्व भएको बताउनुभयो । उहाँले अल्ट्रासाउण्ड परीक्षणका लागि जनकपुरधाम वा अन्य शहर धाउनुपर्ने बाध्यता अब धेरै हदसम्म अन्त्य हुने विश्वास व्यक्त गर्नुभयो।
अल्ट्रासाउण्ड मेसिन सीएफडब्लुए र वन हर्ट वर्लड वाइडको सहयोगमा प्राप्त भएको नगरपालिकाका स्वास्थ्य शाखा प्रमुख रामकुमार ठाकुरले जानकारी दिनुभयो । प्रारम्भिक चरणमा सेवा गर्भवती महिलालाई लक्षित गरेर सञ्चालन गरिएको उहाँले जानकारी दिनुभयो । उहाँका अनुसार ग्रामीण अल्ट्रासाउण्ड सेवाबाट गर्भावस्थाको अवस्थाबारे समयमै जानकारी प्राप्त हुने, सम्भावित जटिलताको पहिचान गर्न सकिने तथा जोखिमयुक्त गर्भ भएका महिलालाई आवश्यक परे विशेषज्ञ सेवामा छिटो रिफर गर्न सहज हुनेछ । यसले सुरक्षित मातृत्व कार्यक्रमलाई समेत थप प्रभावकारी बनाउने अपेक्षा गरिएको छ । उद्घाटन कार्यक्रममा विभिन्न वडाका वडाध्यक्ष, स्वास्थ्य संस्थाका प्रमुख, स्वास्थ्य शाखाका सह–संयोजक अमरेश यादव तथा स्थानीय सरोकारवालाको उपस्थिति रहेको थियो । नगरपालिकाले ग्रामीण क्षेत्रमा गुणस्तरीय स्वास्थ्य सेवा विस्तार गर्ने दीर्घकालीन योजनाअन्तर्गत यो सेवा सुरु गरिएको जनाएको छ । यस कार्यक्रमले मातृ तथा शिशु स्वास्थ्यमा सुधार ल्याउनुका साथै सुरक्षित गर्भावस्था प्रवद्र्धन, मातृ–शिशु मृत्युदर न्यूनीकरण र स्वास्थ्य सेवाप्रति नागरिकको पहुँच वृद्धि गर्न महत्वपूर्ण योगदान पु¥याउने अपेक्षा गरिएको छ । सो मेसिन हस्तानान्तरण कार्यक्रममा सिएफडब्लुएका अध्यक्ष महेन्द्र प्रसाद यादव तथा कार्यकारी निर्देशक लक्ष्मेश्वर मंडलको उपस्थिती रहेको थियो ।