चिकनामा बालमैत्री समावेशी विद्यालय भवन तथा खेलमैदान उद्घाटन

2 महीना पहिले प्रकाशित

Smrititimes

जनकपुरधाम, असार २९ गते ।
धनुषाको विदेह नगरपालिका–३, चिकनास्थित श्री राष्ट्रिय आधारभूत विद्यालयमा नवनिर्मित बालमैत्री समावेशी चारकोठे विद्यालय भवन तथा खेलमैदानको सोमबार उद्घाटन गरिएको छ । प्लान इन्टरनेशनल नेपालको आर्थिक सहयोग, असमान नेपालको आयोजना तथा विदेह नगरपालिकाको समन्वयमा निर्माण सम्पन्न विद्यालय भवन र खेलमैदानको उद्घाटन सोमबार एक विशेष समारोहबीच सम्पन्न भएको हो । उद्घाटन समारोहका प्रमुख अतिथि विदेह नगरपालिकाका नगर प्रमुख बेचन दासले गुणस्तरीय शिक्षाका लागि सुरक्षित, समावेशी र बालमैत्री विद्यालय पूर्वाधार अपरिहार्य रहेको बताउनुभयो। उहाँले यस्ता साझेदारीमा आधारित विकास कार्यक्रमले सामुदायिक विद्यालयको शैक्षिक गुणस्तर अभिवृद्धि गर्न महत्वपूर्ण भूमिका खेल्ने विश्वास व्यक्त गर्नुभयो । कार्यक्रममा विद्यालय व्यवस्थापन समिति, शिक्षक, अभिभावक, विद्यार्थी, स्थानीय जनप्रतिनिधि तथा विभिन्न संघ–संस्थाका प्रतिनिधिहरूको उल्लेखनीय सहभागिता रहेको थियो । नवीन विद्यालय भवन र खेलमैदान निर्माणसँगै विद्यार्थीहरूले सुरक्षित, व्यवस्थित तथा बालमैत्री वातावरणमा अध्ययन र अतिरिक्त क्रियाकलाप सञ्चालन गर्न सहज हुने अपेक्षा गरिएको छ ।